COOLPIX S6900自拍九宮格

自拍、群拍玩咗咁耐，人氣絲毫沒有減退，睇吓「自拍神器」出極都有就知，連相機界老大哥Nikon都發布COOLPIX S6900，裏裏外外皆為自拍而設計。最過癮係玩埋九宮格拼貼功能，並提供黑、白和粉紅3色機身選擇，男女用家通殺。

機背腳架棟篤企

不少相機都加入反芒自拍功能，其實反芒只不過係基本配置，要自拍得徹底，就要學吓S6900，佢不僅於機背植入3吋側揭式屏幕，讓用家自拍時睇清楚靚樣，正面還加入快門鍵，自拍更就手。若然唔想每張相都單手拎機咁麻煩，機背另備有支撐托架，能把相機垂直企定定，構圖更具彈性。

拼貼變換表情

想自拍與別不同，各位可利用新增的拼貼功能，揀選連拍4張或9張相片，拍攝後相機會自動將影像整合於一張相，以便擺出不同表情和動作。提到自拍又點少得美顏功能，新機增設魅力模式，可選擇柔化肌膚、美白、柔和效果和鮮艷設定，仲有不同程度供調校，當中柔化肌膚和美白能夠令肌膚變得白滑，而柔和效果會使相片變成好似沙龍咁款，展現朦朧美。

有齊黑、白、粉紅3色選擇，無論男女都啱用。

為了方便連線，備有Wi-Fi快捷鍵以便進入相關介面。

支援Wi-Fi及NFC

影完靚相梗係要第一時間擺上網，新機植入Wi-Fi和NFC功能，以手機一嘟機側即可連線，又或者按下機頂的Wi-Fi快捷鍵，便可進入連線介面，再透過《Wireless Mobile Utility》手機App做到遙控操作和過相。除了影人之外，新機用上一支25mm廣角的12倍變焦鏡頭，內置四軸混合式防震系統，影景一樣咁掂。