芒亨4G殺到！新N3DS LL屠龍
今期最Hit嘅遊戲肯定係《Monster Hunter 4G》，除咗因為「芒亨」叫座力驚人外，同期仲出埋新款N3DS LL特別版主機，難怪日版水貨抵港時，單係遊戲已炒貴至$550。雖然亞洲版行貨喺今日登場，定價$368亦屬合理，但佢只能夾番舊設計嘅港版N3DS主機玩，有辣有唔辣！
同綑特別版主機
任天堂夥拍Capcom推出嘅《Monster Hunter 4G》新N3DS LL同綑裝，名為「Monster Hunter 4G首席獵人」版，主機用上鏡面處理技術，令機面充滿金屬質感，並印上首席獵人的象徵圖案，外觀非常搶眼！這個同綑版日本定價為25,600日圓（未連稅），香港首日到貨時做緊大約11算，計番港紙二千尾都唔算好貴。新機除咗有大屏幕外，最特別是XYAB按鈕上多加一個C Stick，方便喺芒亨等遊戲轉換視點。雖然佢名為C Stick，但實際一啲都唔似「蘑菇掣」，只係感應到用力方向嘅按鈕，手感唔算好，但總算對屠龍有幫助。
千刃龍霸氣十足
今集嘅點題魔物係「千刃龍」賽爾雷基歐斯，佢係一隻閃着金色鱗片、擁有超大爪子及雙翼嘅飛龍，上月東京遊戲展嘅試玩版便要挑戰這頭魔物，幾乎所有玩家敗陣而回。唔少曾經喺系列作現身嘅魔物如有紅色彎曲獨角嘅一角龍、喜歡潛伏地底嘅大名盾蟹等亦悉數登場，啱晒各位有經驗的獵人鍛煉身手。
武器新形態動作
至於獵人所用嘅武器其實同以前差唔多，經典如大劍、操蟲棍、太刀、片手劍、狩獵笛都有，但今集嘅武器外形經過微調，而且追加咗新動作，例如備有劍和斧兩種形態的充能斧，在劍模式下可以盾衝撞並接連使出「高出力屬性解放斬」絕招，而在斧模式下使出「高出力屬性解放斬」時，可透過屬性強化攻擊力同盾性能。此外，雙劍亦追加連接鬼人強化的特定攻擊技能，重弩炮亦可於發射中途使用威力強大的龍擊彈，直接對Boss造成極大傷害。
艾路合體技幫拖
今集遊戲只要有兩隻以上的隨行艾路，即可使出「艾路合體技」，可組成一支外觀既可愛又有實際用途嘅團隊，如孭上大喇叭嘅「貓式加油樂團」，艾路會演奏音樂提升獵人嘅體力同生命值；當化身為「貓式火龍車」時，艾路還會操控火龍車大炮，在旁邊攻擊魔物！今集另追加名為「舊沙漠」的新獵場，會以日間同晚間場景出現，外觀獨特之外，沙丘上的高低落差及斜坡地形亦為玩家帶來挑戰！
芒亨Pop-up Store登陸旺角
不僅有新遊戲及特別版主機推出，連「Monster Hunter 4 HK Pop-up Store」都以期間限定方式進駐旺角 「NAMJA TOWN」。Pop-up Store當然少不了大量「芒亨」精品發售，由T恤、手機掛飾到咕o臣都有，總計有逾350款由日本直送及別注版商品。此外，店內特設「操蟲棍」同「烤肉」影相位，免費畀粉絲影相留念！
Pop-up Store詳情
日期：即日起至12月14日
時間：11:00am~10:45pm
地點：旺角朗豪坊9樓03~11號舖NAMCO店內
網址：http://www.facebook.com/NamcoWonderPark
DETAILS
類型：動作
開發：Capcom
平台：N3DS
售價：約$419（日版）、$368（亞洲版）
撰文：布偉倫
攝影：張錦昌
查詢電話：2359 7998