旺角爆發暴力和非禮事件的晚上，我和一些商界及傳媒界朋友吃飯，大家一邊談話一邊看手機，因為心裏記掛着旺角的狀況，所以在咀嚼甚麼都不太在意。
A驚訝：「點解搞到咁恐怖？」B氣憤：「對女學生性侵犯，真係好無恥！」C擔憂：「萬一有人死傷咁點算？」D感嘆：「依家你話可以點收科？」在座朋友中，似乎不太支持佔中，或者支持爭取自由但對佔中手段有保留，畢竟各人背景不同，自有各自的想法，但對大是大非都同一口徑，認為暴力和非禮在任何情況下都不能姑息。
全體一致認同的另一事項，是在Facebook小心發訊息，平日的吃喝玩樂買衫換鞋，都暫時不去張揚，正如E說：「對我嚟講根本就係『國殤』，唔應該仲Focus喺個人層面。」
此時，A說：「某本雜誌啱啱喺Facebook轉發啤酒大特賣廣告，出面風聲鶴唳，佢仲叫人齊齊隊啤？雖然話同客戶簽咗約，但係都要了解吓個市面發生乜事。」B接着：「我有個朋友仲抵打，2分鐘前貼咗個開心Emoticon，因為喺屋企睇緊嗰套電視劇大結局。」
我相信，有人一定會說：「唓！又話講民主！我唔支持佔中都要一齊傷心？就唔可以發表開心事？咁仲係民主嚟嘅？」是的，你完全有權利說你想說的話，恰當與否卻不是由你定斷，社交場合有其Etiquette，社交媒體也有其禮儀。你不懂，或許是你不懂做人。
網址：www.chan-wai.com