３大爆紅群組 攝獵山野

「流浪攝」挑戰難度

成立約兩年的「流浪攝」，由聯師兄、Tony和露伊3人組成，佢哋走遍香港各大山峰，涉及的題材非常廣泛，例如險線、星空、瀑布等。原來3人之前都係獨行俠，想搵到更靚景點才聚首一堂。「一個人始終去唔到太險峻嘅地方，反而三人行互相照應，先至夠膽挑戰難度高嘅山峰。」他們唔鍾意去熱門地點拍攝，發掘一些冇乜人識嘅險地，影出嚟嘅相先會同其他人唔一樣。

雲霧散去現日出

3人經常天未光就上山，無非為了捕捉晨光初露，事關日出時個天會清啲，畀人一種新開始嘅感覺。「影日出通常夜晚2、3點就出發，而清水灣的上洋山、石澳的打爛埕頂山及飛鵝山道的象山，都係影日出嘅好地方。不過最深刻莫過於有一次去紅花嶺影日出，嗰次行得辛苦又遇上大霧，原本預計失敗收場，殊不知大霧突然散去，腳下出現一片雲海，加上遠處高樓聳立和太陽初升，估唔到香港有咁靚嘅景色。」

新界東北留紀念

「流浪攝」相當重視新界東北發展，近半年專登走到附近的高山拍照，記錄這片土地，藉此提醒港人關注保育問題。「新界東北有魚塘、有農地，走到上水華山、禾徑山、蛇嶺等山峰，再望落嚟嘅感覺舒泰，田園背後仲會見到深圳對岸的摩天大廈，咁強烈嘅對比其實都幾諷刺。」此情此景或許影埋這兩年便會消失，只能靠相片去回憶和

追溯。

「山中遊子」 人景合一

「山中遊子」的創辦人大宇和AM，早於讀書時認識，後來齊齊行山並成立團體，讓更多志趣相投的人士上山創作，他們指出：「平時工作和生活已經有好大壓力，上山可以遠離煩囂之餘，亦能放空腦袋，激發更多創作靈感。至於攝影只是表達內心感受的一種方法，有時會改以繪畫或文字創作。」他們的作品最大特色是將人與風景結合，甚至將人物隱藏在畫面之中，與自然融為一體。

展現金黃色芒草

依家雖然踏入秋天，其實仲有不少夏天「水尾」嘅主題，例如螢火蟲、水流等。若想拍出秋天的感覺，他們指可借助大部分山頭都搵到的芒草。「大東山、馬鞍山都能夠搵到芒草嘅蹤迹，而且日落前影最好，一來黃昏的光線冇咁強烈，二來能夠令芒草變成金黃色，配合逆光拍攝帶來剪影效果更有意境。」

「風景王」 奇石共賞

擁有十多年山攝經驗的「風景王」Jeffrey表示，上山影相嘅原因好簡單，就係可以接觸大自然，而且香港有近七成地方屬山地，故此可以行嘅地方比想像中多，拍攝奇岩怪石係最愛題材之一。「香港嘅奇石大多分布在離島，如南丫島的菱角山種類較多，加上奇石形狀獨特，要諗到佢哋似乜，實際只有三分形象，需要用上七分想像力。」

順光加廣角取景

奇石嘅形態好多時係人們自行想像出來，要影嗰樣似嗰樣，Jeffrey認為先要搵一個最佳取景角度。「影奇石最好以順光拍攝，避免逆光反差問題，否則奇石表面會變得昏暗，而拍攝時建議使用廣角鏡頭，因為奇石普遍都好大舊，拍攝者所企嘅位置好窄，廣角鏡頭能在有限空間捕捉到奇石全貌。」

撰文：黎子豪（部分相片由受訪者提供）