EXILIM TR50 神器變魔鏡

相隔大約半年時間，Casio推出新一代「自拍神器」EXILIM TR50，大家別以為只係小改款，今次反而裏裏外外都大革新，最大亮點是機身加入獨特的凹凸菱形花紋，未拎上手已感覺到Bling Bling光芒，配合數碼鏡、變換膚色等功能，令神器的「魔力」昇華。新機預計10月正式上架，相信又會掀起一陣炒賣潮。

凹凸菱形花紋

新一代TR50提供玫瑰紅、香檳金及寶石紫3種顏色選擇，用色比以往更加華貴，而且機面和底部均加入凹凸菱形花紋，它以多種塗層壓鑄而成，廠方表示這技術暫時只有日本山形廠房做得到，所以新機係正宗嘅Made in Japan，質素自然有保證。除了機身的花紋，細心觀看之下還會發現鏡頭外圍加設仿鑽石的切割裝飾，兩者配合起來於燈光照射下，散發着耀眼光芒，女士們定必為之傾倒。

數碼鏡扮靚靚

不少女士都會帶備鏡子出街，以便隨時補妝及整理儀容，有咗TR50以後連鏡子都唔使帶，皆因新機植入全新數碼鏡功能，能夠將屏幕充當鏡子使用，仲可放大各位個靚樣，還支援「PAUSE」暫存畫面功能，方便大家睇清楚個樣有冇瑕疵。此外，「自拍神器」系列出名「唔靚執到靚」，新機的美肌能力再次提升，特別引入美顏Plus和智能美顏包圍式曝光，按一下快門便能展現出3種不同深淺度的膚色，以後要美白抑或古銅色肌膚毋須逐級調校。

提供華貴的寶石紫、玫瑰紅和香檳金3種顏色選擇。售價：$9,980/各

快門鍵設置於機身旁邊，手持自拍更加就手。

大型感光元件

女士們未必會理會相機規格，只要影得靚就得，其實新機內置比過往更大的1/1.7吋感光元件，配合21mm超廣角鏡頭，畫質細膩之餘，同時可吸納更多光源，加上鏡頭旁邊的LED燈亮度提升近一倍，就算環境唔夠光，各位自拍時依然明艷照人。自拍完靚樣，梗係要第一時間上載到社交網站，故新機支援Wi-Fi功能，只要於手機預先下載《EXILIM Remote》App，除了可實時取景及遙控拍攝，仲可即時過相擺上網博Like。