PARKOUR工廈飛躍拍案叫絕
提起Parkour（或稱飛躍道、跑酷），很多人以為是街頭玩意，不過用得其所一樣可融入生活之中，以網上瘋傳的短片「忍者女學生」為例，便有日本學生妹於校園跳躍穿梭，還將動感影像拍攝下來，放上YouTube爆紅。惟喺街上亂咁跳隨時受傷，所以有高手特別喺香港工廈開設Parkour教室Movement Lab，讓一般人可以喺導師指導下安全地練習，可能下一個「忍者」就係你！
室內練習夠安全
對Parkour玩家來說，找一個合適場地向來困難，首先四周要有足夠障礙物，還要受日曬雨淋之苦，更擔心玩玩吓被人趕走，令不少初學者卻步。玩咗6年Parkour嘅香港飛躍道協會成員阿Tim，聯同一班志同道合人士創辦Parkour教室Movement Lab。他表示：「室內場的優點是不受天氣或環境限制，而且場內鋪滿軟墊，跌落地都唔怕受傷，初學者可打好基礎後才嘗試出街玩，我們還開辦了兒童班，基本上大人細路都啱玩。」練習場由多個木箱與多條連接着的鐵柱構成，鐵柱的位置可任意調校，能模擬戶外環境，例如由一條水平鐵柱跳至另一條鐵柱的Precision Jump，利用垂直鐵柱做的凌空旋轉等，可連貫地組合出不同動作。
拍片要定考工夫
早前網上瘋傳的YouTube短片「忍者女學生」，利用了不少Parkour技巧在校園及街頭疾走，當中還透過Action Cam加插第一身主觀鏡頭，令整條片更富臨場感及速度感。阿Tim表示：「Parkour加Action Cam一向有人玩，但要拍得好卻有很多地方要注意，例如一般人將Action Cam戴喺頭盔，其實這未必是最好的，皆因Parkour會令頭部劇烈搖晃，而且做一些旋轉動作時，鏡頭甚至會因離心力而鬆脫。建議買一些專為拍攝而設的背心，將Action Cam掛於胸前令短片更自然穩定。」
阿Tim認為女學生的跳躍及攀爬動作只屬入門級數，例如一開場主角便以Monkey Vault技術，一手按牆一手按櫃來跳過障礙物，之後還加插了一些特技從高處跳下來，配合翻騰動作來吸引人注意。
另一段以Action Cam拍攝的人氣短片，講跑手挑戰港鐵，由旺角站出閘跑去太子站追逐同一班列車，雖然最終失敗收場亦唔算Parkour運動，但阿Tim認為跑手若能應用Parkour技巧，避開人群和障礙物，定可縮短時間進入列車。
細心設計連貫動作
可能有人認為Parkour只是亂跑亂跳，其實每個動作如何連貫都經過細心設計。阿Tim解釋Parkour是由跳躍、疾走、平衡、旋轉、攀爬等動作構成，設計動作前會先考慮如何用盡環境如燈柱、梯級等，先確定障礙物是否安全，然後會試吓做一些獨立動作，掌握到後便可將多個動作連貫起來。正如跑港鐵追列車都要預先計劃好樓梯位、出閘位、路線等，不過點跑點跳都好，最緊要係注重安全，只要練習得宜定會熟能生巧。
入門訓練推介
在新蒲崗工廈開設的Movement Lab，可說是香港少有的室內Parkour訓練中心，備有成人班、女士班、兒童班、健身班等供入門人士提升技巧。
活動詳情
時間：可選擇於周一至周五6:30pm~10:30pm、周六或日10:00am~10:30pm上課
費用：$600/5堂（每堂1.5小時）
網址：www.parkour.hk
撰文：周仲明
攝影：盧展程
模特兒：Kate（Zmodel）