又係以未來世界為舞台，角色設定又熟口熟面，但開發商Bungie不甘重製另一隻《Halo》射擊遊戲，故於新作《Destiny》加入近似RPG的「升呢」元素及MMO的線上遊戲設定，並糅合射擊遊戲精髓，開創出Shared-World Shooter遊戲！難怪它於7月推出Beta版時獲得玩家一致好評！
Bungie是開發《Halo》頭3集的遊戲公司，其後獨立不再單為Xbox製作遊戲，《Destiny》可說是其首部自立門戶作品。單純從角色及場景設計上，帶有幾分《Halo》影子亦無可厚非，如3大種族之一的人類（Humans）造型，就跟《Halo》嘅Spartans士兵相似；而Exo種族亦有着Master Chief的影子；唯一新種族是覺醒者（Awoken），外形神神秘秘，似天使又似魔鬼。而這3個種族為保護地球，跟外星生物決一死戰。
新作的舞台設於未來世界，人類喺太陽系其他行星殖民，但經歷巨變後，只剩下地球的「Last City」，故事描述守護者（Guardians）為保存這個最後城市而戰。《Destiny》不甘於定位為新射擊遊戲，因此引進RPG元素如「升呢」等設定，並容許玩家為種族選定職業，如人類可揀選成Titan、Hunter及Warlock 3種職業，每種職業將支配角色的戰鬥取向，如傾向進攻或防守，亦能使出不同必殺技，是一般射擊遊戲少見；而每種招數都可從技能樹上升級，RPG元素相當重。
戰鬥方面，角色只要將能量棒儲滿，便可召喚工具幫手，其中一招是可召出電單車穿梭地圖，慳番唔少腳骨力。地圖則採用開放式設計，開發小組話遊戲世界富有生命，令玩家每次都有機會遇到唔同事件，幾似MMO線上遊戲，不過各位唔可以見到身處同一伺服器嘅玩家，只能見到經配對揀選嘅人士，所以開發小組將遊戲定義為Shared-World Shooter類別。此外，新作畫面表現亦比當年《Halo》時代大有進步，在次世代主機更可輸出1,080p畫質。Bungie早前選擇於PlayStation發布會示範遊戲，故新作於PS4及PS3加入獨家內容都唔意外，譬如Crucible模式及Strike模式可玩到獨家地圖。
類型：射擊
開發：Bungie
平台：PS4、Xbox One、PS3、Xbox 360
售價：$429（PS4、Xbox One）、$369（PS3、Xbox 360）
查詢電話：2359 7998
撰文：布偉倫