E-PL7逆向翻芒「群」起而拍

潮流興玩群拍，連帶Usie、Wefie等新名詞崛起，Gadgets亦紛紛加入自拍功能，不過各位唔知有冇發覺，十部DC有九部都玩向上Flip芒或扭芒自拍設計，一式一樣新意欠奉。Olympus全新E-PL7卻突破框框，改玩逆向翻芒，可將3吋屏幕向下翻，部機舉得高啲，塊面都影得尖啲啦！

售價：$4,990（連14~42mm II R單鏡套裝）、$5,990（連14~42mm EZ單鏡套裝）、$6,990（連14~42mm EZ及40~150mm雙鏡套裝）

180度下翻屏幕

E-PL7的3吋觸控屏幕可向上翻90度之餘，還能向下翻180度，啱晒群拍使用。下翻屏幕嘅好處多籮籮，用家就算加建閃光燈，都唔會被屏幕遮擋；而且大家為了睇住個芒，手會比平時舉得高啲，拍攝V煞臉絕冇難度。最過癮係向下翻芒後，電動鏡頭會自動縮回廣角端，取景角度更添靈活。新機還加入倒數自拍功能，可自設倒數時間、拍攝張數等，畀足時間各位轉換表情和動作，咁就唔使成日Re-shoot咁掃興。

支援180度向下翻芒設計，電動鏡頭仲識自動縮回廣角端。

機身改款設計

相比上一代E-PL6，新機的外觀變化頗大，表面加入仿皮紋理，整體感覺更Grand之外，還提供黑、白和銀黑3種顏色選擇，散發着復古味道。原本機背的轉盤亦改為十字桿，機頂快門掣則加入操作轉盤，調校設定一步到位。而機頂設有Hotshoe，可加建附送的FL-LM1閃光燈，群拍補光都夠用。至於硬件方面則引入E-M10的三軸防震系統，同時兼容影相和拍片，配合1,610萬像素感光元件及TruePic VII處理器，擁有每秒8張連拍速度，無論群拍或拍微電影都可確保影像清晰。

新增兩款濾鏡

向來愛玩濾鏡特效的Olympus，為E-PL7新增復古及部分取色兩種效果，合共有14款濾鏡之多，唔好以為復古只係將相片變成啡色，它還細分成3種設定，反差和色調各有不同。至於部分取色亦分為3種，可展現畫面中的某一色調，最特別是使用時相機會提供顏色環畀各位揀，有成18種色域及深淺度咁多。機身另內置Wi-Fi功能，廠方亦準備推出新版《Olympus Image Share》手機App，強化遙控拍攝及拍片功能，而且可使用Live B快門，夜晚玩Light Painting等更方便。

用上1,610萬像素感光元件及TruePic VII處理器。

背面由轉盤改為十字桿，操作一步到位。

採用1,210mAh電池，可拍攝約350張相片。

同場加映

PT-EP12防水殼及UFL-3防水閃燈

快門掣加入操作轉盤設計，調校設定更順手。	機頂備有HotShoe，能夠外接附送的FL-LM1閃光燈或另購的電子觀景器。	PT-EP12防水殼及UFL-3防水閃燈售價：$5,990（PT-EP12防水殼）、$3,990（UFL-3防水閃燈）
9mm魚眼餅鏡群拍必備售價：$790（9mm魚眼鏡頭蓋）