遙控貨車鬥真唔鬥快

模型車種類多

今次搵嚟玩咗十幾年遙控貨車、RC-Daily網站嘅資深玩家阿輝，傳授玩遙控貨車心得。事前，小記當然做定功課上網搵料，發覺香港遙控貨車迷真係好有Heart，將模型車做到成架真車一樣！他解釋：「玩貨車嘅朋友最重視車身外觀，單計香港流行嘅TAMIYA『雙星』1:14出品，貨車車頭、拖頭已經有近10款畀你揀，而且車後嘅拖架都有好多選擇，拉貨櫃、擺油缸、拖平板都得，可改裝嘅幅度又大，比一般模型車更多變化。」而遙控貨車喺德國、荷蘭等地已有一段歷史，出品以做工精細聞名，亞洲嚟講就以日本玩得最精，當地玩家鍾意加入誇張嘅電鍍、暴走族風格。

精細改造愛車

訪問當日，一眾發燒友拎齊愛車到場，全部都經過精心改裝。「基本上我哋淨係會保留個拖頭同底盤，其餘一律改晒！」原來每個貨車迷心目中都有一部Dream Truck，會根據真車將模型大改造。阿輝續道：「有玩家無意中見到一架德國STURM運輸公司嘅貨車，於是決定整架一樣嘅遙控模型。由於呢款車造型獨特，所以由拖頭顏色以至整個貨櫃都要DIY。第一步要上網搵番相關相片及搜集車身資料，最難係要計算出正確比例，之後就要用鋅鐵、鋁板、膠板等素材『砌』個貨櫃出嚟，為求像真，連喺貨櫃外嘅冷凍裝置都要整埋；當然唔少得噴番最搶眼嘅橙黃色，以及印埋車身廣告，足足整咗成年！」難得係車身比例、物料質感都激似，甚至比起模型廠Herpa推出嘅同款1:87模型更精細。

拖頭經過重新噴油，貨櫃仲要DIY，足足整咗成年。	Futaba遙控套裝備有14個頻道，可自行設定各按鍵功能。	放大圖片

Dream Truck價值不菲

又要改裝車頭，又要加入貨櫃，仲要玩埋燈號和聲效等裝置，為咗Dream Truck，遙控貨車迷可說費盡心思。阿輝表示，以香港常見嘅「雙星」出品為例，一般拖頭模型約$3,000，貨櫃則要$2,000左右，而前後燈、聲效和電子變速套裝大概$2,000；若然要控制車身燈號，最少要有個4頻道遙控器，價錢約$1,000。這還未計自行噴油改裝，所以要砌架似樣嘅Dream Truck，絕對不惜工本！若各位有興趣的話，可到專營遙控模型的玩具舖或網上交流。

放大圖片	噴上黃色嘅Mercedes-Benz 1850L泥頭車，泥斗可以經遙控器升降。	RC-Daily資深玩家阿輝表示：「由於遙控貨車嘅馬力大，試過用嚟拖包米，甚至其他重物都掂！」

查詢電話：2782 7835

激似燈號聲效

影相時只要將架車放喺石屎地或瀝青地，再淡化背景同比例，張相十足十真車一樣；但遙控貨車迷又點會咁易滿足，皆因架車識得郁至係精髓。遙控模型要識得郁，唔少得基本嘅摩打、充電池、電子變速器同埋遙控器，而遙控貨車仲會加入燈號同發聲組件，可以着埋車頭燈、霧燈、指揮燈、尾燈，以及模擬不同嘅行車聲音等。最過癮係組件互相同步，當開車時就有撻車聲、行車時會響起「轟轟」嘅拖架撞擊聲、入後波時會着起尾燈兼發出「嗶嗶」聲，唔夠電壓竟然會有死火聲！此外，唔少玩家會為貨車加入相關電動組件，好似泥頭車會整個電動泥斗，拖車就有電動吊臂，小記真係要寫個服字！

玩家可放置工具等小物於貨櫃內，不過車身負重會提升。	基本嘅頭燈、霧燈一律有齊，用遙控器可以隨時開關。	升高拖頭便見到遙控接收器、電路板、摩打，最特別係有震子，可營造車頭震動感覺。

慢速起動傳神

喺香港玩遙控貨車大多唔會鬥快，而是以均速慢行為主，「一般電子變速器由慢至快會有1、2、3波，我哋平時都係行1、2波為主。」別以為慢速控制就冇難度，阿輝話遙控貨車嘅車身長、重心高，轉彎、泊位嘅難度較高。除咗喺空地、馬路、公園「巡遊」之外，發燒友仲會定期搞車聚，分享製作心得。他補充：「其實外國不時會舉辦RC（Radio Control）Truck賽事，場地會提供賽道、情景等模擬實際環境，近年內地亦開設了專為遙控車而設嘅『廣州宜車城』，由於香港暫時冇相關場地，所以遙控車迷有機會一定要去一轉。」

喺香港貨櫃碼頭經常見到嘅MAERSK貨櫃車，玩家將佢改為可拆式貨櫃。

參照舊款HINO拖頭來打造，原來玩家嘅屋企人以前都係揸同款車，絕對有情意結！

撰文：林子聰

部分攝影：張錦昌

模特兒：Nie（ZModel）