長炮DC 相中抱月

「月到中秋分外明」，每年中秋正藉秋高氣爽，天朗氣清，因此看似比其他月份更圓更皎潔，在開心賞月曬月光慶團圓之餘，又怎可以淨係睇，浪費又圓又大的明月掛天邊，一於帶埋長炮DC，以相片擁抱滿月，今次邀請了銀河小王子Will Cho分享影月技巧，教大家如何拍出不一樣的八月十五的月光。

留意月出月落時間

雖然中秋節成晚都會見到滿月，如果人人都係影月亮特寫，似乎冇特別，因此構圖時不妨配搭前景，Will表示：「以前景襯托會令到畫面更獨特和豐富，不過要留意月出或月落的時間和方位，事關月亮升得太高，就難以與建築物拍攝，所以事前應實地視察環境，想好拍攝的畫面。」他使用《The Photographer's Ephemeris》和《Star Walk》手機App協助拍攝，前者睇月出月落的時間、方位及角度等，後者則觀察月亮的軌迹，他更提醒大家要密切留意天氣，密雲就難拍到皎潔的明月。（9月8日月出時間為5:51pm；月落時間是4:57am）

焦距愈長愈有利

影月亮肯定用長焦距鏡頭，而且愈長愈好，皆因長鏡有助增強壓縮感，月亮所佔的畫面比例先至唔會太細，Will指出：「其實影月亮唔一定要用單反或者無反，長炮DC仔都可以Zoom得好遠影特寫，而拍攝時建議使用M Mode（手動模式），確保快門在1/400s或以上，而光圈收細至F8~11左右，畫面唔會太鬆散，再因應曝光而調校感光度。」若然焦距唔夠長，不妨利用高像素的相機拍攝，再加後期剪裁。此外，由於月亮本身相當明亮，跟漆黑的背景有很大反差，應該選擇「點測光」，月亮先唔會因為曝光過度，而失去月球表面的紋理。