Jolla首現香港換殼變臉

所謂「有得揀，先至係老闆」，但家陣嘅智能手機，唔係Android就係iOS，焗住揀其實都幾慘！幸好以上情況快將改變，事關3香港即日起推出全球首部Sailfish OS智能手機Jolla，除了手勢操控夠破格之外，換殼後仲可同步轉埋主題介面，香港為亞洲首站推出之地，擺低$2,888就有得玩，啱晒貪新鮮又精打細算嘅香港人！

售價：$2,888

前Nokia班底打造

2011年成立嘅Jolla屬新手機品牌，論知名度雖然不及其他大牌子，但若說其幕後團隊是Nokia前員工的話，相信大家會對佢另眼相看。正因如此，Jolla外觀略帶Nokia Lumia系列影子，機身方正配以黑色屏幕邊框，感覺熟口熟面。新機奉行無鍵設計，全機除了鎖機掣及音量掣外不設任何按鍵，加上底面顏色各異，外觀尚算有型。跟流行的一體成形手機不同，Jolla可拆殼換電，廠商稱機殼為「The Other Half」，不但提供白、黑、綠、紅4色，還內置NFC技術，一經蓋上便自動開啟預設的主題介面，同步換埋桌面顏色、字體、鈴聲甚至個人檔案，改頭換面更方便！

Sailfish OS需時適應

Jolla所用嘅Sailfish OS，以昔日Meego系統為開發基礎，主打手勢操控，大部分指令均需要透過滑動、拖拉等動作來表達，例如從屏幕兩邊向中心滑動可回到主頁，從底往上拖可查看通知頁，連虛擬快門掣的位置也可隨意更換，完全為單手操作而設計。小記實測所見，手機操控大致流暢，但由於上下左右滑動都有不同效果，指令多而難記，好多時頁面跳轉到叫人無所適從，加上教學模式睇完仲混亂，連玩機無數嘅小記都要舞一大輪先開始習慣。有彈亦有讚，其首頁變成一個工作管理員，用戶除可在此直接Kill Task，按實圖示往右拉還可更新狀態，大大簡化操作。

跟機送白色「The Other Half」機殼，紅、黑、綠3色則需另外選購。

外觀似足Lumia手機，機面一粒虛擬鍵都冇，夠晒簡約！

可用Android Apps

硬件方面，它內置Qualcomm 1.4GHz雙核心處理器、1GB RAM及800萬像素鏡頭，惟4.5吋屏幕的解像度只有960×540，整體只算中規中矩。不過新機賣點始終係軟件，例如Apps數量夠多，不但有Jolla Apps可用，用戶還可經Yandex或Aptoide等市集下載Android程式，常用如《facebook》、《WhatsApp》等都有得下載，加上它支援安裝apk檔案，絕對唔驚冇嘢玩！售價方面，Jolla淨機價為$2,888，3香港用戶申請$168至$598的4G LTE Super Plan，更可以$0出機，並以$180換購原價$250的智能手機殼。

機頂設有3.5mm及microUSB介面，並印有Jolla字樣。

另有連4色機殼的VIP禮盒裝，但數量有限，售完即止。售價：$2,888

配備2,100mAh電池，夠傾約9小時電話。

軟件有優勢

Jolla為全新智能手機品牌，問到優勢何在，其市場總監Tim McDonald表示︰「我們現時大約有120名員工，當中大部分以前從事軟件開發，因此很熟悉用戶需要。」他又指，目前不會預計全球銷量有多少，新機旨在讓用戶認識品牌，提供更佳的智能手機選擇。

僅厚9.9mm尚算纖薄，但方正機身的手感只屬一般。	向下拉可拉出捷徑選單，以開啟常用工具。	Jolla Store提供各式Jolla及Android Apps。
預載3款主題介面，用戶可經網絡下載更多款式。

SPEC.

制式：GSM、WCDMA、LTE

可更改虛擬快門掣位置，方便單手操控。	運行中的程式全放於首頁，按實圖示向右拉即能更新。	電話簿除備有大頭貼，上下拖拉至指定連絡人還可直接撥號。
Jolla市場總監Tim McDonald認為新機的優勢在於軟件。