以銀河作背景的英雄漫畫，以往大多正經嚴肅到暈，但來到2014年，正正經經已難有出路，反而騎騎呢呢仲有觀眾緣。由Marvel改編同名漫畫的電影《銀河守護隊》（Guardians of the Galaxy），甫上映即獲一致好評，咁又難怪，有《Star Wars》般的龐大宇宙觀加上5位騎呢英雄，無論各位係Sci-Fi迷還是Super Hero粉絲，總會氹到你入場！
Marvel 的漫畫改編電影已是近年票房保證，但唔係Iron Man、Thor就係美國隊長，睇得多都有啲悶！有見及此，廠方遂把一些不太出名的英雄漫畫改拍成電影，頭炮正是《銀河守護隊》。選擇此冷門漫畫，除了因為角色夠多，容易迎合觀眾需要及衍生玩具等周邊產品外，最重要係佢可與Marvel其他作品起串連作用，例如《雷神奇俠2》出過場嘅收藏者便是新作的關鍵人物，另外客串的魁隆更曾於《復仇者聯盟》中出現，由此可見，《銀河守護隊》絕非濫竽充數，反而起到承先啟後作用。
跟型英帥靚正嘅「復仇者」不同，呢班主角實為烏合之眾，故事講蠱惑仔星爵意外偷得遠古神器「源球」，自此惹來各方追殺，為求自保惟有與女殺手嘉魔娜、羅南仇家兼大隻佬毀滅者、神槍手火箭浣熊及樹人組成「銀河守護隊」，看守寶物之餘兼保衞宇宙。齋聽故事已經過癮，更有趣係風格有齊格鬥、空戰及外星怪物，全片更模仿80年代電影，音樂性強兼勁多笑點，難怪獲得一致好評。
美漫達人Jerome指，《銀河守護隊》被拍成電影早有迹可尋。「最初1969年嘅《銀河守護隊》一直唔受歡迎，因為故事發生喺宇宙，讀者較難代入。但當Marvel決定拍成電影後，就喺2008年搵來Dan Abnett同Andy Lanning重新編繪，故事角色及世界觀都重新Reboot，前期工夫做到足，等讀者熟悉咗角色後再拍成電影，睇戲時自然更投入。」根據原著，守護隊不只得5名成員，Captain Marvel、Agent Venom甚至Iron Man都係成員之一。至於電影看點，Jerome指最期待係隊員之間能否擦出火花。「5條友都唔正常，齋睇佢哋嗌交已經好正！」
由Dragon Models推出的Marvel 1:9 AHV系列，以3D立體塑像技術重現各位主角的神髓，各售$838。
查詢電話︰2493 0215
撰文︰陳志滔