貝澳摸蜆扮海女

計好潮退時間

想摸蜆首要識睇時間，喺農曆初一或十五（如嚟緊8月10日及8月25日）前後幾日，預啱潮退後去就最理想，皆因各位可步行至平時淹沒蜆群生長的深水區，至於邊日和幾點潮退，便需於出發前上天文台網頁（www.hko.gov.hk/tide/ctide_main.htm），參考潮汐預報圖表啦！睇法是垂直數值代表潮水漲退，曲線愈低代表潮退愈厲害，而水平數值則是時間，預計好潮退時間，便能更易摸到蜆。

摸蜆節目豐富

香港嘅摸蜆熱點包括大埔三門仔馬屎洲、馬鞍山烏溪沙、屯門小欖、西沙泥涌等，但數到最熱門不得不提大嶼山的貝澳，雖然此處不能直接駕車去到，要於東涌轉乘巴士或的士，但勝在水清沙幼蜆量多，沙灘旁還有燒烤場，摸完蜆後可直接燒來吃。而且沙灘有救生員當值，海灣夠長亦適合玩滑浪板、獨木舟等水上活動，玩到攰又可於茶座坐低歎杯凍飲。摸完蜆仲可順道欣賞埋附近美景影番張靚相。

泥耙鏟子加膠桶

所謂「工欲善其事，必先利其器」，摸蜆亦一樣，常用的摸蜆工具是泥耙、鏟子及膠桶，就算帶一些小朋友的摸蜆玩具都夠用，嫌麻煩的話可於貝澳沙灘旁的小食亭購買金屬鏟子（售價$10）。而摸蜆方法很簡單，潮退時步行到深水區，找一片濕潤深黑泥地，用泥耙輕輕掘開泥沙便有機會摸到蜆！如想即摸即煮來吃的話，建議自備小刀將蜆打開清洗乾淨，咁就唔怕食到成口沙了。

貝澳水清沙幼蜆量多，沙灘旁還有燒烤場及更衣室。於東涌巴士站乘3M巴士，於貝澳新圍村下車即達。	摸蜆三部曲 Step1：用泥耙輕輕掘開泥沙，如感覺碰到硬物便有機會是蜆。	Step2：用鏟子掘起周圍的泥沙，便發現蜆了。

達人教路即煮

Camp Style露營專家Jacky表示：「現場想燒蜆來吃的話，最好用中慢火，由於蜆帶有海水鹹味，就算唔落調味料都已夠鮮甜。如想更惹味，可等蜆燒到開口後放一些椒絲或碎蒜，待蜆慢慢收水即可。」除了燒蜆，各位還可挑戰「清酒煮蜆」，只需帶備一個小鍋，或以錫紙摺成凹形，將清酒倒下去煮熱再落蜆。Jacky提醒：「炮製酒煮蜆時不能太大火，否則容易搶火造成危險，而清酒煮蜆最好的工具其實是沙鍋，因為受熱較為平均，煮時不用蓋上蓋，一邊搞一邊煮，肉質就夠晒嫩。」

Step3：將蜆隻放入膠桶內，加點海水使其吐沙。如要即煮的話，可用小刀將蜆隻打開清洗。	只需在燒烤爐鋪上鐵絲網，便可即燒新鮮蜆隻來吃；如蜆已吐好沙，燒到開口便可食用。	將錫紙摺成凹形，把自備的清酒倒落去，酒熱後可以落蜆慢煮，熟後加入葱花更惹味。

專家意見：細蜆應放回沙中

生態專家HKTraveler創辦人Charles表示：「夏天之所以特別多人摸蜆，全因夏天退潮幅度大。很多人以為摸蜆會破壞生態，其實只要不過度捕捉，摸蜆時會抓鬆泥沙，令空氣進入沙中，有助蜆群生長。為免破壞生態，摸蜆絕不能過量，而且發現一些未成熟的細蜆時應該放回沙中，讓佢哋繼續成長，這樣才能讓生態長遠發展。」

撰文：周仲明

攝影：謝孝祥

模特兒：Nina（Reborn Production）