My Kicks, My Game新世代鞋頭
十多年前的波鞋盛世，有點睇頭都炒上三五千，限量聯乘更要萬萬聲，Sneakerhead（意即滿腦子均是波鞋的狂迷）當時可以獲得最新資訊只得兩種媒介：一、睇圖唔識睇字的日文波鞋雜誌（仲要係月刊），二、就是朋友間口耳相傳。在潮流巨輪不停轉動下，波鞋熱潮亦再次回歸，在今日咩都要快嘅年代，最新最快波鞋資訊亦可以從兩個媒體上知道得一清二楚，分別是YouTube及Instagram。今回就找來兩位活躍於網絡平台的新世代「鞋頭」──Kent Lau及JYD現身說法，解構當今之波鞋熱潮！
網上節目
近來成為新世代Sneakerhead代表之一嘅Kent Lau，自言自中學開始接觸波鞋，擁有近400對波鞋收藏、曾試過花上五、六千元入手CHANEL×Reebok Pump Fury，其網上連載波鞋節目《香港腳Hong Kong Foot》漸為人所熟悉，首集尾聲更怒劈AJ1「Bred」引起話題。看似大晒家中波鞋收藏，但實情全為普羅大眾波鞋迷着想，旨在袋錢入大家袋。「搞呢個網上波鞋節目主要是見冇乜人做呢類波鞋介紹，同時見呢兩三年波鞋熱潮非常熾熱，但大家好似只係盲木咁追；希望藉着這節目令大家更深入認識波鞋歷史，有多啲資料參考。」
鏡頭所見每集都有大量波鞋出鏡，到底全是其珍藏，還是公關宣傳手法？「其實每集錄影最花時間就是前期工作，亦即是集齊不同年份、版本的波鞋拍攝，當中大約7成是個人收藏，其他都是找好友幫忙！」
正價入手
另一位鞋迷JYD，自1997年入手人生第一對Air Jordan 12「Obsidian」開始，就不停向籃球鞋領域進發，至今收藏200對波鞋，當中超過一半為AJ鞋款。「自己最初其實最喜歡Penny Hardaway，波鞋都是以他的簽名鞋款為主，其後睇得多先漸漸喜歡Michael Jordan，自始就一直買下去，基本上每一對都會着。惟獨是於上年入手的AJ1『Bred』，因為只入手到一對，而且細節非常接近原版，所以一直不捨得着，直至有日朋友放售其收藏，我便馬上以$2,700炒價向他購入，自此才有得着！」
家中過百對AJ波鞋，JYD直言全都以正價入手，絕少以炒價入手，就算較罕的「Fear Pack」亦一樣正價購買，「對AJ3『Fear Pack』好少人知道香港有發售，而當日我都是Walk-in到店舖購買，好記得發售當日就是我媽媽的生日。」同系列的AJ4亦從網上成功入手，但同系的AJ5則只能望門輕嘆，「對AJ5『Fear Pack』因為貨量少，炒到上五、六千所以我都冇買。」原來忠心用家粉絲亦一樣有買唔到嘅鞋，實在令人嘆息惋惜！
全球唯一
早前一個波鞋展覽上展出一對全球唯一的AJ7「XX8 Days of Flight」，而該對不作發售純作宣傳用途的神級限量波鞋擁有者就正是JYD，可以擁有呢對全球唯一波鞋的原因，就是其日Post夜Post靚波鞋相上Instagram，「上年Jordan Brand於All Star Game期間為宣傳Air Jordan XX8搞咗個宣傳活動，只要Post上與Air Jordan波鞋相關的照片上Instagram再Hashtag『XX8 Days of Flight』，當時我分別影左AJ1、AJ3、AJ6及AJ7，最後Jordan Brand就看中我用3對AJ7砌出心形照片，跟住就將呢對AJ7『XX8 Days of Flight』送咗畀我，因為呢對鞋我更Instagram認識到其他得到不同代數『XX8 Days of Flight』的Sneakerhead，成為好友定時定候以Email交流波鞋經。」JYD表示，知道外國有瘋狂波鞋Collector分別以每對約10萬港幣的價錢於eBay收購此系列，亦曾以7萬港幣「利誘」他，最終亦被他婉拒。
難分真假
自言逢買必着的JYD，近年都已經將部分非AJ的波鞋出售，專攻Air Jordan。有見近年人人都一窩蜂狂追AJ，又炒賣圖利又借機賣假貨，自問「老手」的他若無一對真貨在手亦難以分辨真假，奉勸大家入手時要小心，要多做功課去了解多點當中的細節及歷史，不要隨波逐流人買我買，做一個真正懂得欣賞波鞋的Sneakerhead。
1 on 1專訪──Kent Lau
Q：點解首集《香港腳Hong Kong Foot》會於尾聲斬開對AJ1「Bred」？
A：其實都是應導演要求做，希望可以為節目帶來一點視覺衝擊，而嗰對鞋係2013年的Retro版本。
Q：每集節目都有大量波鞋用以拍攝，是否要花上很多時間？
A：籌備每集大約2至3個星期左右，真正拍攝大約花上一整日，最主要都是構思如何將大量波鞋擺放於鏡頭下拍攝。
Q：見YouTube暫時只連載至第3集及特別版，還會繼續拍攝嗎？
A：絕對會，其實現時已拍攝好了幾集，只是會分段上載，未來希望能加入一些波鞋保養、護理心得等實用性資料，讓大家更深入了解波鞋文化。
Profile
February Heavenly主腦兼網上波鞋節目《香港腳Hong Kong Foot》主持，於首集節目尾聲時怒劈該集「主角」AJ1 Bred引起話題，玩鞋資歷近10年，家中儲有近400對波鞋。
1 on 1專訪──JYD
Q哪些AJ係你想擁有而暫時未能入手？
A：1989年AJ1 OG「Bred」同1994年AJ1 Retro「Bred」，因為始終是第一對簽名鞋款，而1994年版本細節設計亦是最接近原版，所以一直都在找這兩對Air Jordan。
Q：由AJ1到AJ XX8，你最喜歡哪一款？
A：AJ3「Black Cement」，因為個人覺得由呢代開始先有Jumpman Logo，感覺特別正宗，而且鞋形及黑色主調都是我最喜歡，所以呢對亦是我着用最多的一對。
Q：擁有這麼多對Air Jordan，有無試過着到爛？
A：有，好不幸地兩對都是AJ8，真係着到鞋踭位爛咗，唔係擺得耐變「粉底」，因為我全部鞋都會着，係真正的用家。
Profile
玩鞋資歷十多年，擁有200多對波鞋，當中包括過百對Air Jordan籃球鞋，最強收藏為全球唯一的Air Jordan 7「XX8 Days of Flight」，個人最愛為AJ3及AJ1系列。
撰文：賴文曦
部分攝影：胡振文
場地提供：Dahood