另類踩夜車 穿梭鬼古奇案
暑假大熱天時，唔少單車一族都會聯群結隊夜晚出動，「踩夜車」頓成年輕人的熱門活動，更衍生出不少另類玩法，想緊張啲可參加結合鬼古與奇案元素的單車團，唔想咁激亦有舊區導賞團及渡海團。其實踩夜車又點止得元朗、大埔、大圍、將軍澳等單車徑，你唔悶我都悶啦！
「慢」遊Check Points
農曆七月，相傳鬼門關會大開，「慢騎主義」facebook版主Man鬼馬地搞咗個以鬼古及奇案為主題的「九龍刑」導賞團應吓節，他表示：「其實去年都搞過類似嘅導賞團，主題係『魍魎輪徊』，踩單車去遊覽港島各靈異Check Points，及後有團友問會唔會搞九龍團，所以今年夾番農曆七月搞『九龍刑』。」今次預計有9個Check Points左右，主要有土瓜灣、大角咀、油尖旺、九龍城等，每到一個Check Point都會停低講解，到時可能會因應時間而更改行程。
搜集剪報及文獻
籌備一個導賞團，事前要花相當多工夫去搜集資料、準備和探路，Man強調：「『九龍刑』的鬼古和奇案會揀啲有文獻記載和報章報道，內容先唔會太空泛，而且可睇到當時社會的民生和人性面。不過要從圖書館和網上搵剪報，有時都要靠彩數，因為要喺海量嘅資料搵素材有一定難度，前前後後都準備咗成個月。」由於「九龍刑」預計要夜晚出發踩到天光，所以Man事前會探路。「我會先決定故事才訂立路線，亦要考慮點與點之間的路線是否可行，如果太偏僻的話就唔會揀，以免發生危險。」
油麻地鬼手打麻雀
為了感受一下夜車團氣氛，小記跟住Man走了一趟油麻地。他於某唐樓停下來解說：「早於50年代，這裏曾傳出一宗怪事，事緣４人打麻雀時，其中一人開槓，然後旁邊突然有一雙手收錢，另一邊又伸出一雙手去摸牌，嚇到4人即刻去報警，因而引來街坊圍觀，這亦反映當時社會對呢類靈異事件嘅好奇。」除了鬼古外，還有佔相當比重嘅奇案故事，例如林過雲兇殺案、水箱藏屍案等，同樣叫人聽得毛骨悚然。Man再三提醒，團友到時千祈唔可以亂講嘢，要尊重自己和事件，同時亦禁止當場討論信仰問題。
Bike The Moment中西區小城探索
發掘新地方並引入好玩元素的Bike The Moment，每月都會搞一次「單車周末夜」，早前跟「健康空氣行動」合作，舉辦了包含夜騎導賞的單車Tour「小城的簡單快樂」，游走中西區各景點，並由網主Hughes親自解說。他指出：「當晚由上環太平山街出發，途經文武廟、百年石牆樹、第二街公共浴室等景點，最後以西環公眾碼頭為終站，每到一個景點都會停低講解背後的歷史。」被問到舉辦呢類活動有乜難度，他笑言：「最難係前期安排和臨場應變，由於會途經多個景點，所以事前要做足功課，而且花了4天時間把周邊街道走一次。其實港島區的路線頗有挑戰性，事關好多時要上山落山，不過能享受於城市踩單車也是值得。」
Holicycle單車渡海夜騎
如果覺得導賞團要踩吓停吓唔夠爽，其實仲有其他選擇，單車文化概念店Holicycle不定期會搞Private Tour，於7月初就聯乘Numb Workshop舉辦「Cross the Harbour」夜騎活動，顧名思義是單車渡海嘅意思。其負責人之一Voila表示：「當晚一行廿幾人，8點左右喺深水埗Holicycle店舖出發，踩到去尖沙咀再搭渡海小輪過海，然後再由灣仔踩去銅鑼灣Numb Workshop店舖，去到大約10點幾，我哋希望透過活動讓更多人去馬路踩單車，算是一種單車教育。」Holicycle不僅提供租車服務，最特別係可以租過夜，於市區都幾少見。
「九龍刑」活動詳情
日期：8月9日
時間：11:30pm至天亮
人數：20人（若報名人數超額，將會隨機抽籤決定）
費用：免費（需自備單車並有一定操控能力）
撰文：黎子豪
部分攝影：胡振文