Monster「三間」耳機 潮人必搶
Monster耳機向來鍾意玩款，適逢廠商成立35周年，今次特別搵來adidas Originals合作推出別注版耳機，相信唔少「三間」粉絲聽到已經流晒口水。先到貨的耳機分別有黃綠、白紅同綠紅色，對球迷來說亦即是巴西、英格蘭同墨西哥色，顏色夠搶眼之餘，音色表現有保證！
接線分享歌曲
新款別注版耳機由包裝盒、保護袋到耳機設計都做到一絲不苟，包裝盒上既印有「三間」外，還配上adidas專用藍色。耳機則符合人體工學設計，可延伸的頭帶配合高密度海綿耳墊，戴得舒服。而頭帶用上「三間」設計之餘，耳罩內部加入撞色Monster Logo，潮味十足。
雖然廠方冇列出耳機嘅規格，只表明有Monster總裁Noel Lee親自調試的Pure Monster Sound技術，藉此提升動態範圍及音場效果。小記實際試聽後，發覺其高、中、低音表現平均，由Pop到R&B音樂都駕馭得到。而耳機更擁有「Made for iPhone/iPod」認證，跟機設有連收音咪的線控，以便調校音量及透過iPhone講電話。值得留意，其左右耳罩均設有耳線插口，廠方稱之為MusicShare Dual Ports，用上左方輸入音訊時，可另接耳線以右方輸出到另一個Monster耳機，最多可分享到5個耳機之多，一大班Friend齊齊聽歌都掂。
撰文：布偉倫
攝影：林資凱
查詢電話：2998 3974