朱古力Bar形 DP2 Quattro 打破長規

DC發展咗咁多年，個樣由始至終都係大同小異，之但係Sigma全新DP2 Quattro卻打破常規，以長條形的劃時代設計面世，驟眼睇似足朱古力Bar，難怪剛推出便引來網上熱話，究竟它能否殺出條新血路呢？

長條外形增手感

點解DP2 Quattro有成161.4mm咁長？廠方解釋話比起DP2 Merrill，長條外形會有更好手感及平衡體驗，令用家拎上手有用緊單反嘅感覺，而機背凸出的手柄形狀獨特，配合鎂合金磨沙物料，唔易跣手之餘又充滿金屬Feel。此外，長條形外觀造就了機頂有足夠空間加入雙轉盤，而背面按鍵亦經過重新編排，操作性能大幅提升，唯獨帶出街要準備一個長身嘅相機袋，折衷方法當然係直接側孭上身啦！

3,900萬像素輸出

型號加入「Quattro」之名，代表新機採用APS-C格式的新一代Foveon X3 Quattro感光元件，用上1:1:4 RGB結構，最上層的2,000萬像素感光元件可記錄亮度數據及藍色光，另外兩層感光元件則分別以490萬像素記錄紅色光和綠色光，加埋合共提供約2,980萬像素，不過當用家調至「S-HI」畫質拍攝時，可將輸出提升至3,900萬像素，惟要注意全像素輸出不適用於RAW格式，僅支援以JPEG拍攝。新設計不僅提供高色彩分辨率，還可快速處理大容量數據，配合全新TRUE III影像處理器，無論對焦、拍攝、寫入速度都明顯提升。

DP2 Quattro外形似足朱古力Bar，比一般DC更長。

電池提供1,200mAh電量，為了遷就手柄改以斜入式安裝。

機頂設有Hotshoe插座，能加建閃光燈作補光之用。

45mm F2.8鏡頭

為了確保高成像質素，DP系列向來沿用定焦鏡頭，新機亦唔例外，配備一支30mm F2.8鏡頭，相等於135格式的45mm焦距，可說是不折不扣的標準鏡頭，無論是Snapshot風景或影人像都咁好用，加上鏡頭外圍設有手動對焦環，支援全時手動對焦，讓用家可微調焦點。此外，新機提供各種色彩模式，當中的電影院、黑白風格較值得推介，可利用單一色調凸顯相片的寬容度和層次感，仲能按需要調校對比度、清晰度及飽和度。