旅人時光：跟團行超市

「你要訂邊晚？」我要有個準備，他答：「得7月6日可以咋。」我奇怪為何只得一晚有空：「跟團？」他語帶無奈地道：「係呀，我夠想自由行啦！同兩個老人家去邊得吖，惟有當自己無去過日本囉！」

事實上，在我身邊朋友之中，也鮮有跟旅行團之人士，所以我甚好奇他們的行程，於是着他讀出來讓我了解一下。「一落機第一站係Aeon Mall……」他平淡地讀給我聽。

「吓？Aeon Mall？」我真的打了個突。

「乜嚟？」他問。

「即是以前Jusco囉！成個貨倉咁大的Jusco。我愛逛超市，這地方當然超級受我歡迎，但你哋我就真係唔知。」

「咁有無衫賣？有無Beams？」

「都算有衫賣嘅！但你唔會買囉。我相信香港人愛買日本生果買超市食物，買盒士多啤梨買個水蜜桃返酒店食，那個地方真係無得頂！」

乘搭朝早11點的飛機，去到成田空港經已下午5時，到埗後到機場附近的Aeon Mall逛一下，再下榻於附近酒店，既不用出去市區省時省力，又可用盡整晚的空檔時間，還跟當地居民的生活如此貼近呢。

網址：www.facebook.com/lamwaimei/