CAT B15 170g三防硬漢

提起Caterpillar或者佢嘅嘜頭CAT，好多人會想起重型機械、地盤鏟車，甚至是Work Boot鞋款，以應付工地環境需要。勢估唔到佢出嘅手機一樣咁堅，講緊係新鮮抵港嘅B15，單睇佢八角形機身已勁有氣勢，仲要以橡膠、鋁材、防刮玻璃等物料打造，防水防塵之餘，高空跌落地一樣冇問題，用料咁足都只係重170g，真正粗中有細，今期至Man係佢！

機身呈八角形，邊位更加入橡膠及鋁材物料，外形勁Man。<br>售價：$3,288

機身呈八角形，邊位更加入橡膠及鋁材物料，外形勁Man。
售價：$3,288

機身用料足秤

CAT嘅形象向來以粗獷硬淨為主，手機自然要跟足風格。機面用上Corning強化玻璃，令碰撞時嘅刮花機會大減，再睇機身上下部分有橡膠包裹，兩邊則用咗銀色鋁材密封，仲有共6枚螺絲上實，跌落地都冇咁易撞散。而機背加入凹凸坑紋，仲有大大個CAT嘜頭，雙手濕咗水都唔易跣手。最難得係用料足秤，機身都唔算笨重，重量只係170g，厚度為14.95mm，男士袋落牛仔褲都掂，以三防手機來說絕對唔累贅。

跌落地完好無缺

外形咁勁揪，實際三防功能又如何呢？睇番廠方規格，新機支援IP67國際防護標準，換言之可於1米水深正常操作30分鐘及抵擋沙塵侵襲，機身仲有防摔功能，於1.8米高空墜下至水泥地面都照樣用到。小記推介各位瀏覽廠方示範片段（網址：www.cat.com/en_US/built-for-it.html），佢哋先將手機掟落泥水池，之後再搵架多用途鏟車將一排B15輾過，最後手機完好無缺，相當誇張。斷估大家都唔會喺咁極端嘅環境使用手機，小記模擬閒時帶去郊遊行山使用，以水狂淋機面，並由1米高掟落沙石之間，機身都絲毫無損！

機側設有3個黃色實體鍵，左右為音量鍵，中間則是相機鍵。

microUSB及耳機插口均備有保護蓋，落水前記得閂好。

硬件規格入門

為咗應付惡劣環境，新機對外連接位包括microUSB、3.5mm Audio等統統備有保護蓋，連背殼都設有橫拉式安全鎖，保證點撞點揈都唔會甩開。值得一讚是新機加入大量貼心功能，例如較少見的濕手操控，讓用家成隻手濕晒都依舊可輕鬆篤芒；仲喺音量鍵位置加設獨立相機鍵，着芒下長按即可啟動相機拍攝。硬件規格方面則較為入門，僅配備4吋800×480解像度屏幕、1GHz雙核心處理器及512MB RAM，配合Android 4.1.2作業系統，操作未至於Lag，不過亦談不上流暢。幸好廠方表示日後可透過OTA，將手機升級至Android 4.4系統，相信之後的使用體驗會有所提升。