運動耳機　雨戰起跑

Bose FreeStyle撞色設計

Bose一向畀人嘅感覺勁Elegant，估唔到佢今年會一改形象出運動耳機。呢款入耳式FreeStyle有冰藍色同靛藍撞薄荷色選擇，機Gor比較鍾意前者，尤其係配埋紅色線控夠搶眼。Bose嘅質素向來有保證，唔會因為出運動耳機而犧牲音色，好似FreeStyle用上TriPort聲學結構，鼓聲、結他聲全部出到晒，信得過！

Monster iSport Intensity專利耳塞

Monster同Beats分咗家之後，其實都冇影響到耳機質素，好似iSport系列的Intensity運動耳機用上專利耳塞設計，備有導管將聲音打入耳窩，而且耳機設計實淨耐用，仲可直接用水清洗添！廠方將佢定位喺Fitness Room使用，不過戴出街跑步一樣掂，線控仲支援ControlTalk，跑步聽歌唔怕Miss Call。

FreeStyle採用新色調，冰藍版配紅色線控非常搶眼。

附有設計型仔嘅保護套，不過尺寸大咗啲。

Profile：機Gor

機不離身，不信Spec只信測試，不扮高深，懶理低俗，貪新不忘舊。

Monster iSport Intensity 售價：$999（b）	Intensity採用鮮黃色調，具有全天候保護。	跟機的耳機袋非常小巧，易於攜帶。
Win 戴住FreeStyle跑步時，耳機唔會跌出嚟，軟膠耳塞貼耳舒服。

第1回合：鬥舒服程度

機Gor約埋跑友Hody，齊齊戴住兩款運動耳機進行測試，聽住歌跑咗30分鐘後，FreeStyle同Intensity都經得起考驗，唔會邊跑邊甩。不過論舒適程度，FreeStyle感覺稍勝一籌，皆因它提供大、中、細碼耳塞選擇，機Gor耳仔大少少用中碼，Hody耳仔細啲揀細碼，加上軟膠設計靈活性大啲。

第2回合：鬥防水防汗

夏天做運動預咗成頭大汗，撞正好似今個禮拜嘅天氣，跑步隨時遇着傾盆大雨。幸好兩款運動耳機均具備生活防水及防汗功能，濕少少水都唔怕，同時可拆掉耳塞清洗。由於Intensity機身採用全密封設計，將佢成個放喺水喉下沖洗都唔怕；而FreeStyle機身有幾個「穿窿」出聲位，防水性能輸咗個馬鼻。

FreeStyle耳機有不少出聲位，唔可以直接擺落水沖洗。	放大圖片	Win 將全密封的Intensity直接放入水中沖洗都冇有怕。
放大圖片

第3回合：鬥音色靚聲

運動耳機嘅聽歌選擇同一般耳機都幾唔同，相信冇乜人會跑步聽Orchestra啩？機Gor用上兩首節奏強勁嘅歌曲測試，分別係PSY Featuring Snoop Dogg《Hangover》同Lady Gaga《Applause》。相比之下Intensity太注重高音人聲，將背景音樂壓得太低；FreeStyle嘅人聲、背景聲做到平衡自然，唔會互相蓋過對方，而佢嘅隔音效果冇咁強，跑步聽歌時都可聽到環境聲，遇到危險都識閃人！

機Gor Report：跑街跑山 聽歌良伴

從佩戴舒適度及音色表現上，機Gor認為Bose FreeStyle略略佔優。而Monster iSport Intensity注重實用性為主，加上扁平耳線設計唔怕跑步時繞線，又可直接用水沖洗，較適合全天候跑友或山系人士「粗用」。今次一於買齊兩款，前者戴住跑街，後者用嚟跑山，咁就Perfect啦！

達人教路：Lyra Media主編Cato Mak：「注意聽診器效應！」

「選擇運動耳機時，可從多方面考慮自己需要。第一要試吓耳機舒適度，這一定要親身試戴才知道哪一款適合自己；第二是防汗防水性能；之後要諗清楚自己常聽甚麼類型音樂，一般跑友會偏向重節奏感歌曲；最後要考慮隔音性能，唔能夠揀太過隔音的耳機，因為這會降低使用者的警覺性。試戴時還可跑兩步，睇吓有冇聽診器效應，即入耳式單元受到外來撞擊或者空氣摩擦，產生震動而造成刺耳聲音。」

撰文：機Gor　

模特兒：Hody（Gaiety）

查詢電話：（a）2123 9000、（b）2998 3974