10倍變焦！K zoom手機長炮

炎炎夏日，好多人鍾意到戶外拍照，但影相時又要行近又要行遠，喺烈日當空下都咪話唔攞命。好彩小記帶咗Samsung新機GALAXY K zoom出門，單睇外表佢係一部智能手機，但只要長按快門掣，10倍光學變焦鏡頭即時伸出，企老遠都影到Close Up，「智」影得係佢！

核心增加對焦快

Samsung並非首次推出相機型手機，可惜對上一部S4 zoom，冇4G之餘相片處理速度又慢，市場反應叫好不叫座。有見及此，GALAXY K zoom追加4G上網功能，處理器亦由雙核心變成1.3GHz四核心加1.7GHz雙核心型號，小記實測所見，其對焦及存相速度提升不少，差不多做到篤芒即對焦，影友肯定冇投訴。改良的還有外形，雖然機身變得肥大，但解決了上代頭重腳輕問題，拎起嚟更穩陣；加上背蓋印有S5的仿皮革暗紋，外觀高貴了不少。

大CMOS相機設計

K zoom備有實體快門掣、變焦掣及Xenon閃光燈，長按快門時鏡頭會由機身彈出，設計與DC無異。小記將手機帶到大埔海濱公園實測，其24mm廣角鏡頭能拍到廣闊的吐露港海景，若用盡10倍光學變焦加2倍數碼變焦，連海中心的小船也拍攝得到，在OIS光學防手震技術輔助下，景物也未見模糊，表現令人讚賞。另一要讚是採用1/2.33吋 BSI CMOS感光元件，Size比一般手機大1.8倍，配合F3.1光圈，於低光環境下能吸納更多光線，難怪黃昏時影日落美景都咁清啦！

正面看同GALAXY智能手機一樣，內置TouchWiZ介面，最多可自訂7版主頁。

正面看同GALAXY智能手機一樣，內置TouchWiZ介面，最多可自訂7版主頁。

K zoom（下）比同廠S5（上）屏幕略細0.3吋，但顏色飽和度更高，睇相更靚。

K zoom（下）比同廠S5（上）屏幕略細0.3吋，但顏色飽和度更高，睇相更靚。

機旁設有變焦掣，一按即Zoom，絲毫不見遲滯。

Pro Suggest推薦場景

新機採用Android 4.4.2系統，並預載自家TouchWiZ操作介面，除了提供簡易模式及懸浮工具等功能外，還把Smart Mode智能場景增至28種之多，有齊美肌、全景、HDR、有聲拍攝及手動模式等。若嫌太過複雜，用家更可開啟「Pro Suggest」功能，讓系統按環境需要，自動推薦最佳場景，初學者必用。溫馨提示一下，由於機身電池只有2,430mAh，長時間拍攝都幾快冇電，幸好它可更換電池，又可把屏幕轉為黑白以節省電力，慳住玩都夠用大半天。