仔女必讀！雙卡機冧Daddy
近期各大廠群起搶攻雙卡手機市場，畢竟港人北上消遣、公幹和探親頻繁，唔少子女仲想趁住父親節送部雙卡機畀老竇，等佢哋中港兩邊網上遊，甚至WhatsApp到畀佢哋，少份擔心。隨着雙卡機愈出愈多，一些名詞如雙待單通、移動版、聯通版等，搞到人頭都大埋，想知道點樣發揮雙卡機嘅優勢，甚至幫老竇搞埋大陸上網Plan，就要留意以下應用攻略。
應用篇：雙待雙通方便
很多人以為雙卡手機只係同時插入兩張SIM卡，原來不同機嘅功能存着不少差異，代理多個雙卡手機品牌嘅Pengbo，其店長Ben表示：「其實雙卡手機一般可分為單待及雙待，單待代表兩張SIM卡雖然一齊插入卡槽，惟兩卡不能同時待機，用家想更換使用中SIM卡，便需要先喺手機調校設定；而雙待即兩張SIM卡可同時待機和操作，當然方便啲。」除咗待機問題，查實雙卡機都有單通、雙通之別，他續道：「如果手機只支援單通，當SIM 1通話嘅時候，SIM 2號碼便會打唔通；兼容雙通嘅話，SIM 1通話時SIM 2有來電都可以接聽，自然冇咁易錯過來電。」
切忌插錯卡槽
手機插SIM卡睇落簡單，但當中都有學問，Ben提醒大家：「其實大部分雙卡機係3G加2G，即係其中一個卡槽支援WCDMA，另一個卡槽只支援GSM；換言之只有一個卡槽兼容3G上網，將3G SIM卡插錯咗落2G卡槽嘅話，網速自然大減。」另要留意手機版本，皆因唔少店舖從大陸入貨，但內地因應網絡制式而衍生出聯通版及移動版，前者嘅WCDMA制式同香港3G網絡相同，後者卻採用TD-SCDMA制式，換言之嚟到香港淨係用到2G。
網絡篇：儲值卡更抵玩
想拎部雙卡手機喺大陸上網，梗係要配合埋當地網絡，識玩嘅一定揀儲值卡。其實內地大台好似中國聯通、中國移動等都有推出儲值卡，不僅收費合理，仲要喺香港嘅便利店隨時買得到，咁就唔使喺當地四圍搵SIM卡啦！
中移動免費接電話
中移動喺內地出名接收得好，呢款名為一咭兩號嘅儲值卡就最啱用嚟煲粥，皆因只要用家身處香港或內地，以此卡接聽當地來電完全免費，相當抵玩！唯一可惜係數據漫遊僅支援2G，速度會慢啲。
售價：$148
（內含$75儲值額，每日上網收費上限$38）
中國聯通3G上網快
如果想上網快啲嘅話，可考慮中國聯通嘅「跨境王」。除咗有一卡兩號之外，仲支援3G上網，而且數據計劃大玩中港共用，即係內地用唔晒嘅數據，返到香港仲可以繼續用，夠晒慳家！
售價：$120
（內含$66儲值額，中港兩地上網日費$38/300MB）
程式篇：《Track The Person》家人安心
雙親北上，身處香港嘅仔女難免掛心，既然幫老竇搞掂咗雙卡網絡，不妨裝埋《Track The Person》App，它可透過GPS及網絡替用家定位，並把身處位置資訊話畀其他人知，家人自然更加安心。
售價：免費（Android）
《Find My Phone Antitheft》追蹤失機
身處內地，最怕係唔見手機，各位可幫老竇裝定《Find My Phone Antitheft》，用家可透過另一個安裝咗此App嘅裝置，如電腦、手機、平板去追蹤手機位置，甚至透過鏡頭監控周圍環境，仲可開啟Buzz功能令電話響起。
售價：免費（Android）
手機篇：Desire 816 Dual Sim5.5吋大芒煲劇
HTC Desire 816 Dual Sim備有5.5吋720p屏幕，配合BoomSound前置喇叭，聲畫效果出眾，最啱北上搭車時睇片。另備有1,300萬像素鏡頭，適合鍾意Snapshot嘅爸爸。
CoolPad K1 雙卡搭4G上網
一般雙卡機只支援3G網絡，上網當然唔及4G啦！CoolPad K1係首部支援4G加2G網絡嘅機款，兼容1800MHz及2600MHz頻譜，老竇只要身處香港，就可以放心極速上網。
Lumia 630 WP 8.1多色之選
唔想揀Android手機的話，可試吓Nokia Lumia 630，它採用WP 8.1作業系統，方格主頁夠易用，加上備有黑、白、黃、綠及橙5色選擇，潮爸必捧。
爸爸有Say
身為爸爸級人馬嘅IT達人Francis表示：「我經常要四圍公幹，至於揀咩漫遊上網Plan其實好睇去幾多日，如即日來回嘅話會選擇Day Pass，幾天短Trip就會買儲值卡，至於長駐內地就建議各位申請番個當地月費計劃更划算。」
數字人生
Gordon E. Moore
24：根據摩爾定律（Moore's Law），每24個月
集成電路的電晶體數目會增加一倍，時至今日，處理器仍循着這定律發展。
1968：1968年創立NM Electronics，後演變成Intel英特爾公司。
2001：2001年向加州理工學院捐
出6億美元，校內的摩爾實驗室以其命名。
2008：2008年為表揚他對半導體及微處理器等
業界貢獻，獲IEEE頒發最高榮譽Medal of Honor。
撰文：林子聰
部分攝影：蔡浩文
查詢電話：（a）3077 5588、（b）2717 8131、（c）2136 6338