我依然記住小學時凌空一控一射窩利眉底破網的美好畫面（如未能幻想，請參考公民外援迪天奴在今年賀歲盃的金球），我以為，我是個沒有出道的隱世足球高手，直至我遇上迪天奴。
日前拍攝電視節目，請來在香港球壇橫行多年的巴西籍球員迪天奴接受雞同鴨講的訪問，訪問就不贅了，主菜是迪天奴一人勇戰我們三位主持的世界盃熱身賽。
（以下進入講波佬Mode）上半場開始，綠衫黑褲右攻左嘅係迪天奴，冇統一波衫嘅係主隊雜牌軍阿Bu、陳強同我林日曦。開波唔夠3分鐘，迪天奴喺後場交畀迪天奴，迪天奴押落底線出波落禁區頂畀迪天奴，迪天奴一個假身扭入禁區勁射破網，主隊連波都未掂過就落後1：0。
中圈開波陳強交畀林日曦，林日曦諗住單刀橫傳畀阿Bu，點知畀迪天奴截到，迪天奴大腳斬畀迪天奴，迪天奴無人看管再將比數拉開到2：0。雖然落後2球，但係主隊並冇放棄，阿Bu用好假嘅假身呃過自己，然後喺後場交畀陳強，陳強面對高大嘅迪天奴，一個巧妙嘅笠傳交畀禁區內埋伏嘅林日曦，林日曦即時用後腳凌空弱射破網，主隊追成2：1，真係攞世界盃都冇咁開心。
臨完上半場之前，主隊嚴陣以待，諗住守住比數過半場，點知迪天奴用身位一個打一萬個，撞跌兩個球員之後，背住禁區內嘅林日曦，食住個身位轉身射入球。雜牌軍球員個個畀敵方撞跌晒喺地下，而且落後緊3：1，場波可以話係擺咗入雪櫃，下半場唔好再提。
一星期後的今天，我按着隱隱作病的胸口在這複述比賽，是想向世界懺悔：對於足球，我都係冇天分。活到那天才真正認識到甚麼是職業球員的身份，如果我等雜牌軍要去職業球場比賽，看來全身的骨加起來都不夠斷……
網址：www.facebook.com/linrixi