新加坡直擊！　LG G3握拳即Selfie

潮流興Selfie（自拍），搞到自拍神器成行成市，但所謂神器，好多都要「夾硬」伸長隻手指按快門，既唔方便又容易手震。剛於新加坡發布的LG年度機王G3，支援全新Gesture Shot功能，各位只要對住屏幕握拳即可倒數影相；配合雷射自動對焦功能，影相快如閃電。此機已於韓國發售，行貨相信好快登陸香港，鍾意Selfie嘅各位係時候儲定錢啦！

5.5吋屏幕金屬塗裝

踏入年中，各大手機廠相繼推出旗艦機王，唯獨LG歎慢板，搞到唔少粉絲心急如焚。等了又等，廠商終於喺新加坡發布G3，小記當然走訪獅城同讀者分享吓啦！齋睇外觀，新機採用5.5吋屏幕，弧形設計有助提升手感，坦白講比同廠G Pro 2更加好拎。要讚的還有金屬質感外殼，塗裝幾可亂真，當中又以金色最搶眼，帶有幾分高雅感覺，除非閣下獨愛另外的黑、白、紫或紅色，否則一定揀佢！新機稍後還會推出QuickCircle保護套，靚唔靚就見仁見智，但其圓形天窗可以睇埋時間、撥電同播歌，比傳統保護套更具玩味。

雷射對焦握拳影相

新機以「Simple is the New Smart」為設計概念，務求將一切操作化繁為簡，其中以影相一環最能體現。首先，其1,300萬像素光學防手震OIS+鏡頭，支援全新雷射對焦技術，能利用雷射光線探測物件距離，從而提升對焦速度。小記帶新機往新加坡環球影城測試，發覺即使對住高速舞動嘅Dancers，也能極速對焦，只是在昏暗環境才稍稍減慢。另加入Gesture Shot功能，G3的前置鏡頭能識別用戶動作，只要一握拳，系統即會倒數3秒拍攝。現場見Show Girls試玩，基本上一出拳就認到，最正係大合照時，十幾隻拳頭一樣認到，以後自拍唔使再伸長手指按快門了！

售價：待定<br>手機採用幼邊框設計，屏幕比例佔機面76.4%之多，視野更廣闊。

售價：待定
手機採用幼邊框設計，屏幕比例佔機面76.4%之多，視野更廣闊。

現場只擺放金、黑、白3色，當中以金色最搶眼。

保留上一代的機背Rear Key，並提供1,300萬像素鏡頭連雙LED燈。

四核運算操作流暢

G3另一賣點係屏幕，像素密度達538ppi，解像度更達2,560×1,440，不但為大廠手機中首見，更比一般720p芒嘅畫質高出4倍之多。小記試播高清片時，連花朵內的花蕊都睇得一清二楚，顏色飽和自然；性能方面，Android 4.4.2系統由2.5GHz四核心處理器及3GB RAM推動，開Apps極之流暢，《AnTuTu》跑分更高達34,286分，比不少對手都要高分。順帶一提，新機另有2GB RAM版本，暫未知香港賣的是哪一款，但肯定是兩者都有1W喇叭連Boost AMP，聽歌高音甜低音準，連樂迷都照顧埋。