韓Game殺入工廈搣 & RUN!

如果要睇韓國綜藝節目，我會揀《Running Man》，既搞笑又過癮！這節目播出近200集，除咗主持和嘉賓搞笑外，最正係「捉迷藏搣名牌」遊戲夠刺激。想玩？其實喺香港一樣玩到，開幕咗冇耐嘅Running Games，玩家可分成兩隊喺過萬呎工廈，同對手鬥智鬥力，似足劉在錫、宋智孝等成員咁喪跑搣對手名牌；而且同時要解謎過關，少啲腦力同體力都玩唔掂！

主題區域互片

Running Games嘅戰場雖然喺工廈入面，但環境設計一啲都唔求其，場地分為4個區域，包括魔法師棋盤、鬼魅魔衣櫥、秘密花園、奇幻迷宮，佔地近12,000呎，空間寬闊。最抵讚係現場擺設逼真，加上昏暗燈光及低沉音樂，未玩已營造到緊張刺激感覺。遊戲方面，設有「不可能的任務」、「巫師的考驗」及「浮石的誘惑」3個團體戰，故事背景、解謎內容以至難度都有分別，玩家要喺1.5小時內完成指定目標。為咗保持緊湊度，建議起碼要5鬥5，即10人互片先好玩。

被搣牌有懲罰

遊戲開始之前，雙方玩家要穿上特製背心，背脊跟足《Running Man》黏上自己名牌。難度在於搣名牌與解謎需同時進行，當玩家嘅名牌畀人搣甩後，便要即時離開場區5分鐘兼進行大懲罰，好似男玩家要做舉啞鈴等運動，女玩家就要玩釣魚等小遊戲。雖則話可以「無限復活」，但來回場區既花時間又耗體力。場地負責人Michael表示，唔同團隊會有唔同戰術，有啲玩家會主力解謎過關，再伺機搣對手名牌；有些隊伍直頭分為男女小組，男隊員負責搣名牌，女隊員就「食腦」做任務，實行分工合作。

嫌紙名牌唔夠靚，玩家可訂製布印（售$80）或者刺繡（售$110）名牌。

被搣甩名牌便要接受懲罰，例如女隊員要喺5分鐘內釣10條魚。

考心思與想像

小記現場所見，場地除咗相當大，仲要係「冇死角」設計，如果喪追人搣牌嘅話，隨時走到氣咳。Michael即場帶路試玩「巫師的考驗」，呢款遊戲係參考《Harry Potter》故事，一開始已經有「九宮格射球」、「迷你籃球」等考驗，之後仲要根據唔同提示，喺不同場區穿梭，攞道具同搵出過關答案，心思不僅要細密，仲要有番咁上下想像力，絕對唔簡單。為咗保持遊戲流暢度，每個隊伍仲會有場地導師跟隨，必要時可作出提示，不過醒目嘅玩家冇理由要貼士掛？