TR35自拍神器甫士5連Chok

不少明星和o靚模都愛上載自拍照到facebook、微博等社交網站，其實只要張相夠靚，裏面寫乜都一樣爆Like。講到佢哋最愛嘅「自拍神器」，定要數Casio嘅TR扭擰系列。廠方剛發布新一代EXILIM TR35，不僅保留21mm超廣角鏡頭及12級美顏效果，今次仲玩埋Posing Shot模式和專屬短片，畀各位享受如名人般的自拍體驗。

售價：待定

擺姿勢拍攝模式

「自拍神器」一向有價有市，事關佢影到「V煞」面之餘，配合12級美顏功能自拍，靚相隨時都美艷動人，所以歷代TR系列炒至過萬元都大把人爭。第5代TR35更將自拍功能推至極限，特別加入擺姿勢拍攝模式（Posing Shot），按下快門後相機會連續影5張相，而每張相之間會有3下嗶嗶聲或者「3、2、1」語音提示，並提供2種蜂鳴聲、2種英文提示及1種普通話提示畀各位選擇，咁就有足夠時間轉表情、換甫士，而且自拍唔再局限於大頭或半身相，影全身相毋須再走來走去撳掣咁麻煩。

三連拍免眨眼

唔少人都試過自拍時眨咗眼，但補影又未必擺得番同樣表情和動作，為此新機引進三連拍功能，按下快門即會連拍3張相，跟Posing Shot不同之處，是三連拍唔會有語音提示，即係「嚓嚓嚓」連拍3張搞掂，作用係避免用家眨眼，畀各位揀最完美嘅一張。此外，新機備有4種啟動快門方法，包括相機框旁的自拍掣、揮手倒數3秒拍攝的揮手自拍、觸控屏幕的篤芒自拍，以及透過Wi-Fi經手機作遙控自拍，用家大可因應需要而撰擇，使用時夠晒彈性。

機身採用偏光珍珠色玻璃塗層，於不同角度下會呈現色彩變化。

用上21mm廣角鏡頭，旁為LED燈和收音咪。

自製專屬短片

如果淨係影相，其實前幾代「自拍神器」都能做到，新作吸引之處係可以幫用家製作專屬短片，只要利用影片製作功能，便可自選5張相片製作出6秒或15秒短片，仲會自動加入過場效果，最過癮係用家能自行揀選背景音樂。今次TR35提供白、桃紅和藍3色選擇，機身用上偏光珍珠色玻璃塗層，於不同角度和光線下，會展現出不同層次色調。另內置Wi-Fi功能，透過《EXILIM Remote》App便能遙控拍攝及過相，擺上社交網站博Like更簡單。

相機框旁邊特設快門鍵（箭嘴示），自拍時更就手。

採用可拆式電池，約可拍攝260張相片。

沿用細小的microSD卡來儲存影像。

「自拍神器」進化史

2011年面世的TR系列，短短3年間出咗五代咁多，第一代TR100首度引入360度旋轉框架，破天荒設計成功衝擊業界。第二代TR150新增拼貼功能及招牌12級美顏效果，玩法更多元化。到第三代TR200進一步引入8種濾鏡特效，讓用家自拍時可玩出不同風格。至於第四代TR15首次於系列中植入Wi-Fi功能，能夠遙控拍攝和傳送影像，並於框邊加設快門鍵，自拍更就手。

新增Posing Shot模式（紅圈），會於語音提示下連拍5張相。	在Best Shot模式引入三連拍，按快門時連影3張就唔驚眨眼。	新增影片製作功能，只要揀選5張相即可製作出6秒或15秒短片。
利用《EXILIM Remote》手機App，能遙控TR35拍攝和傳送影像，以便分享到社交網站。	360度旋轉框架係「自拍神器」賣點，可隨意變換拍攝角度。