相信很多機迷都好心急，皆因Xbox 360射擊大作《Titanfall》延至下周賣街，惟有眼白白睇住Xbox One水貨機主晚晚開戰。不過無論Xbox One抑或Xbox 360版本都好，《Titanfall》的畫面及玩法均令人耳目一新，尤其是結合步兵操控，以及騎乘巨型Titan機體，於戰場跟敵軍6 Vs 6網上對戰，一如遊戲主題誓必「擊倒泰坦」！
《Titanfall》最吸引之處是結合步兵跟機械人玩法，玩家可於陸上以步兵姿態跟敵人駁火，又可騎乘身高逾20呎的Titan機體開戰，所以邊個搶先控制到機體便可佔盡上風。如何快速召喚Titan遂成勝負關鍵，玩家只要於步兵狀態開火擊殺敵軍，或者打低戰場上做陪襯嘅NPC角色，均可縮短召喚時間，當然前者扣減的時間較多。而控制Titan跟細幾倍嘅步兵開戰自然變得屈機，幸好步兵唔一定冇得翻身，步兵除咗移動速度較快外，亦可用上噴射包作二段跳躍，並且能夠爬牆避開強大火力；如果戰術運用得宜，繞到敵方機體背後突襲，分分鐘可反敗為勝。
遊戲登場的3種Titan機體：Atlas、Ogre及Stryder各具特色，Atlas防禦較佳、Ogre攻擊力強、Stryder相對敏捷靈活。除了裝甲等基本屬性外，機體於戰場上可吸收能源提升攻擊力、護盾及滑行能力。遊戲以6 Vs 6多人戰方式進行，正如先前所講，戰場上會出現NPC士兵，擊倒後便可得分，當儲滿經驗值提升等級後，便能解鎖更多裝備；而完成難度較高的挑戰時，更會得到「Burn Card」卡片，可於一定時間內提升指定能力，譬如使用新武器、提升速度或縮短Titan召喚時間等，令遊戲變化及刺激感大大提升。
《Titanfall》多人戰是從射擊遊戲的Death Match等傳統玩法演變出來，如Attrition是靠殺敵縮短機體召喚時間制霸，另一種Last Titan Standing模式則可一開始騎乘Titan玩機械人大戰，惟不少玩家都認為遊戲收錄的地圖唔夠多，有待改善。Xbox One主機行貨幾時推出仍屬未知之數，香港Microsoft就有為Xbox 360版遊戲加推連Xbox 360 250GB主機的同綑版，限定喺4月8日至5月12日推出，定價$2,080都算幾抵，只係呢個時候買部Xbox 360主機有點「雞肋」味道啫！
類型：射擊
開發：Respawn Entertainment
平台：Xbox 360
推出日期：4月8日
售價：$449
查詢電話：2359 7998
撰文：布偉倫