解鎖新招 G Pro 2敲芒有理

敲門、敲竹槓就聽得多，估唔到依家連手機都要「敲」先開到，講緊嘅係LG新一代G Pro 2！作為今季旗艦機王，除了擁有5.9吋大芒、四核心處理器、1,300萬像素鏡頭等強勁規格之外，最過癮係加入Knock Code新功能，可以用手指敲出密碼並為手機解鎖，創意爆燈。

售價：$5,698

3.3mm窄邊設計

G Pro 2 於2月中先喺韓國發布，估唔到咁快有行貨抵港。今次港版嘅外形同韓版一樣，可以話係同廠G2嘅放大版，最特別係繼承咗3.3mm超窄邊框，令到新機雖然有5.9吋巨芒，但單手拎機都好輕鬆。而機背則依舊備有Rear Key背鍵，除咗可以控制開關、音量之外，開關鍵仲加入LED燈，當收到通知訊息即會着燈提示，以後置鏡頭自拍時，仲會自動轉換燈號顏色，提醒用家對焦是否成功，相當實用。

進化版Knock Code

自從G2推出之後，LG旗下唔少手機、平板都加入Knock On或者Knock功能，連敲兩下屏幕便會着芒，好多用家都大讚方便。嚟到G Pro 2都一樣支援此功能，而且引入埋「進化版」Knock Code，屏幕將會劃分為四個區域，用家可設定最少2吓、最多8吓嘅敲芒解鎖方式，只要敲番預設嘅位置和順序，便能着芒兼解鎖，比平時要先着芒、後入密碼解鎖慳咗一步。廠商話Knock Code嘅密碼組合多達86,367個，睇嚟保安程度唔會比傳統密碼輸蝕。

電池容量達3,200mAh，仲可隨時拆殼更換後備電池。

新機設計同G2（左）接近，不過G Pro 2（右）屏幕加大至5.9吋。

強效拍攝功能

韓版G Pro 2備有黑、白、灰3種配色，而港版暫時冇提供灰色，卻意外地加入酒紅色，啱晒女士使用。規格則與韓版相若，硬件包括Qualcomm Snapdragon 800四核心處理器、3GB RAM等；唯一輸蝕係內存由韓版嘅32GB縮少至16GB，幸好仍然可外加最大64GB記憶卡作擴充，擺高清片都夠位。最抵讚係新機配備1,300萬像素鏡頭，不僅支援OIS光學防震及4K短片拍攝，還加入Magic Focus功能，用家可以先影相、後對焦，仲有由微距至無限遠5級焦點可揀，想前清後朦或前朦後清都任你控制！