悟空、路飛、小岡……一眾經典漫畫角色陪伴大家成長，唔講唔知，佢哋嘅「出身地」集英社《少年Jump》，今年適逢45周年，為慶祝佢生日，NAMCO Bandai Games特別炮製出動作遊戲《J-Stars Victory Vs》，將歷年32套作品、共52個角色作2 Vs 2夢幻對決，以立體漫畫風格呈現各人必殺技，究竟幽助嘅「靈丸」定鳴門嘅「螺旋丸」勁啲呢？
話明叫「J-Stars」，收錄嘅角色當然粒粒巨星，當中包括識得變超西出龜波嘅《龍珠》悟空、換檔出招嘅橡皮人《One Piece》路飛等，而《地獄老師》擁有鬼之手嘅夜鳥野老師，以及《暗殺教室》外星八爪魚殺老師亦會登場，人物涵蓋廣泛。小記覺得最過癮要數《IQ博士》小雲，佢可以用便便棒篤人之餘，仲識得叫小吉放電麻痹對手，再擘大口放能量炮。至於部分戀愛及運動漫畫，將以支援形式現身，如《影子籃球員》黑子以誘導術擾敵、《偽戀》留學生千棘出招怒摑令對手喪失召喚能力等。
遊戲以2 Vs 2小組打法進行，角色除咗有體力計之外，畫面上方仲有代表雙方戰力嘅勝利計量表，玩家有3次復活機會完成戰鬥，說穿了其實類似《Gundam Vs Gundam》系列打法。角色可透過戰鬥累積Stamina施展必殺技，亦可與隊友駁招發動Cross Break合體技，仲能呼喚輔助角色使出狀態攻擊。此外，敵我戰力之間有代表小組氣勢嘅V Burst計量表，當玩家完全壓倒戰局時，角色便會進入Victory Burst狀態，限時獲得猛攻機會。
新作備有「J冒險模式」，玩家將到訪夢幻舞台Jump World參與J戰鬥祭典，可從躍動、希望、探求、追迹4個篇章中，任擇其一展開遊戲，體驗不同漫畫嘅互動故事，完成任務後便可收集角色及獲得道具獎勵，想集齊52位角色，就要花一點時間喇！當玩家利用特定角色組合進行戰鬥時，更會引發「對峙演出」事件，如《銀魂》坂田銀時跟《為食獵人》唐利高鬥食嘢等，動漫粉絲必Like。
類型：動作
發行：NAMCO Bandai Games
平台：PS3、PS Vita
人數：1~2人
推出日期：3月19日
售價：7,980日圓（PS3）、6,980日圓（PS Vita）
查詢電話：2782 0978
撰文：廖俊斌