旅人時光：車廂急叉電（上）
很怕坐凌晨機去日本，雖然可以省卻大半天時間，但老人家真係唔係幾捱得，在半通頂狀態下，還要頂到酒店Check In時間才能入房抖一抖，臨近中午見光死那幾粒鐘最難捱。
這次，因事無奈地坐凌晨機前往，清晨6時落機後更需即刻取車開往海邊吃蠔去，預計3小時車程話長不長，兩人輪流開應可應付吧。
晨早入城的高速公路上來個塞車少不免，停停開開經過城市再去郊區駛至海邊，其實已花了4個多小時。狂擦生蠔圓了心願，能量指數驟然急速下滑，但旅館又未能Check In，只好開車周遊看看景點。在迂迴山路走幾轉，精神開支更多，我努力撐開雙眼不斷開車，坐在我旁的那位仁兄早已熟睡到鼻鼾聲猶如開動了陸戰機，眼瞓也有傳染，我頓時力有不逮，於是在頂唔住之下，即時找家便利店駛進去，甚麼也懶理急急叉電去。
我泊正便利店正門前的一個車位，停車、熄匙，用了0.1秒彈去後座橫躺，然後不出3秒已瞓到完全沒知覺。睡呀睡，睡到天昏地暗，突然被一大聲「到喇！」喝醒。原來仁兄見我叫極唔醒，便自行將車開至旅館，我計一計發現自己已昏迷了2個鐘有多，他只少我10多分鐘而已。
但兩條死屍動也不動放在便利店門前，2小時內居然從沒有人前來過問？怎說也是私人地方吧，有人來自殺怎算？「你知唔知道有無店員望過入嚟？」我疑惑地問他：「無喎！無人理過。」他說。日本鄉下就是這樣，人人都大安旨意地想着天下太平，不過我們亦正如此，因為後來我們才發現四道車門也忘了上鎖呢。
網址：www.facebook.com/lamwaimei/