「邨」梭拍攝話華富

無憾而拍

在華富邨已居住了30個年頭的專業攝影師Percy Chan，以前曾經住過九龍城寨和秀茂坪，但由於以往攝影尚未流行，故十分遺憾未有為之前住過的地方拍攝。Percy表示：「自己唔係因為華富邨面臨重建先至特登去影相，其實早在落實加建甲級保安之前，就特地走過一次，因為加咗保安後好多地方都去唔到，有啲角度甚至影唔到。」雖然Percy唔係最早入住華富邨的居民，但都有不少趣聞分享，他憶述：「以前的華富邨好繁華，有大大公司、國貨公司及華富閣戲院等，而且屋邨入口有百貨公司係絕無僅有。不過最令我深刻和難忘是約10年前左右，已結業的華富閣戲院改建成香江大舞台，裏面的表演係專做人妖真人Show，吸引咗唔少內地旅客一車又一車入嚟睇Show，不過經營咗好短時間就執咗笠。」至於提到華富邨有咩必拍景點，Percy就推介了幾個地方：「瀑布灣附近的多尊佛像係必拍景點，其實呢度嘅神像係以往的居民搬遷時所棄置，久而久之個個跟住擺低就變得愈來愈多。另一個景點係華翠樓旁邊的圓形欄杆位置，平時係街坊用嚟曬衫的地方，不過由下而上影會有另一番景象；雖然好多地方都影得到華富邨全貌，但我覺得係由香港仔往南丫島嗰程渡輪，經過華富邨時的全貌係最靚。」

募集舊相比較今昔

影銀河影到出晒名的「銀河小王子」Will Cho都係華富人，屈指一算住咗14年，其實Will接觸攝影開始都一直有在華富邨拍攝，不過以前影相只係為了構圖和獨特建築，「我記得華富邨過往有好多舊式士多及商店，依家都變晒做連鎖店，但係部分店舖例如冰室、理髮店都得以保留，可惜好多舊住戶搬走或者離世，令街坊之間的交流愈來愈少，依家的華富邨唔再係我以前認識的華富邨。」縱使華富邨有「平民豪宅」的稱號，但Will Cho笑言並唔係大家想像中咁太平：「仲記得啱啱入嚟時，見到屋企樓下有人『劈友』，好似拍戲咁成班人一落貨Van就斬人，之後就有警車趕到，經過呢次之後就冇同類嘅事件發生，依家諗番起都幾得人驚。」眾所周知影星星起家的Will「主場」係大東山，不過住喺華富邨嘅佢都已經係「地膽」，並藉此呼籲：「希望網友可以提供一啲華富邨的舊相，

再搵返相中人去同一個地方再影，對比一下以前同而家的變化。」其實華富邨都有唔少拍攝材料畀大家盡情影相，Will補充：「華富邨的雙塔式設計，最特別係中間有個天井，由下面低拍會影到獨特的構圖；另外就係瀑布灣，因為全港只有華富邨附近會有條天然瀑布，

雖然瀑布唔係喺邨內，但唔知重建時會唔會保留，而且瀑布灣望過去南丫島方向，都係一個唔錯的星攝地點。」

來自星星的異聞

華富邨有不少鬧鬼和UFO的傳聞，雲海指：「有傳華富邨的位置前身係日治時期的亂葬崗，所以當初屋邨落成，空置率相當高，而且有人住過話曾經撞鬼，因此流傳了不少鬼古，其中一個故事是四個人八隻手在打麻將，但洗牌時竟然有第九隻手，邨民都指係鬼手；另一個故事是有居民打開門，見到成條走廊都係一舊舊黑色嘢，估計係鬼魂作祟。」除了靈異故事，亦曾經傳出有外星人拜訪，雲海續稱：「大約80年代初期嘅某日早上，曾有圓形物體以超低飛在華富邨上空掠過，其實好多人目擊到，不過當時攝影風氣唔盛行，冇物證去證實，加上好多目擊者唔知咩係UFO，所以被解說為『觀音坐蓮』，以為係觀音顯靈。之不過，兩年前英國解封的UFO檔案，就有記載香港殖民地時期，華富邨對開海域有英軍曾經在戰艦上見到UFO，因此有關事件記錄在英軍的檔案，可惜冇更詳細的資料。」

「平民豪宅」的起源

說到華富邨的起源，就要由公共屋邨說起，長春社文化古蹟資源中心副執行總監黃競聰表示：「1953年轟動一時的石硤尾大火，令多達5萬名災民無家可歸，當時的香港政府為了安頓好災民，特別在火災的原址興建了多幢7層高的徙置大廈，而樓宇結構是參考荷李活道的警察宿舍，不過徙置區的居住環境並唔理想，政府為了改善市民的生活環境，開始興建有獨立浴室和廚房的公共屋邨。1963年，香港屋宇建設委員會宣布興建華富邨，屬於早期公共屋邨的華富邨就於1967年落成，是首個以小社區概念形式的屋邨，有街市、學校等設施自給自足，而樓宇的雙塔式設計由高低兩塔相連，令更多住戶可以面向海景，因而有『平民豪宅』的美譽。」

藉着舊邨說導賞

計劃重建的華富邨當然要作「參觀」最後衝刺，其實香港仲有好多舊屋邨的獨特建築值得一睇，就好似明華大廈、勵德邨、大興邨等。此外，長春社文化古蹟資源中心（CACHe）更不時舉辦沙田公共屋邨導賞團，主要以瀝源邨及禾輋邨為考察路線，讓公眾對公共屋邨有更深的認識。

沙田瀝源邨 重溫《小時候》

於1975年入伙的瀝源邨，大廈採用舊長形設計，各大廈的字首分別為榮、華、富、貴、福、祿、壽，而且以「以人為本」及「自給自足」的屋邨概念，具有各式休憩設施及商舖，是沙田首個公共屋邨。70年代由王書麒及路家敏主演的《小時候》就是在瀝源邨取景。

沙田禾輋邨 多元化設計

1977年入伙，與瀝源邨只是一路之隔，根據沙田的地形而建，擁有多元化的屋邨設計，集雙工字形、單工字形、雙塔式、舊長形及新十字形於一身，為沙田區第二個落成的公共屋邨。

不跟團自己睇！︰大坑勵德邨 特色圓筒形

同樣屬於老牌公共屋邨，於1975年落成，多幢樓宇的圓筒形建築跟華富邨的雙塔式相似，中空的設計讓居民有互相監察的作用，解決以往沒有保安的問題。

筲箕灣明華大廈 結構人性化

在1962年落成，由司徒惠建築師事務所設計，各幢樓宇配合地勢倚山而建，長形設計為中央走廊式，特點是着重採光和通風效果，結構人性化之餘，亦提供了公共空間予居民加深鄰里關係。

CACHe 查詢電話：2291 0238

撰文：黎子豪

（部分相片由受訪者提供）