Hair Styler美髮自有「機」
日日同一個髮型示人，你唔厭時我都悶，但又唔想經常出入Salon花錢花時間，不如搵番個私人Styler來幫手玩變化。若嫌泡泡漂染太傷髮質，橡筋紮頭手抽筋，只需一捲一夾就能造出多種造型的電動美髮器，相信就是你杯茶。不過，邊有話用就用咁容易，看似簡單的電動髮夾實情內藏乾坤，唔想好事變壞事，令佢變成「糊塗夾子」，就要記實以下7大誡。
最潮多用途
事實上，電動美髮器的操作原理十分簡單，就是透過電力轉變成熱力，將頭髮結構改變而造出直或卷曲的心水效果，而這種概念更早於19世紀已經出現。但是，由於沒有化學物質的加持，這個變髮方法並不鞏固，只要再度碰上熱力，便又會馬上打回原形。一般而言，傳熱物料可分為金屬和陶瓷兩種，而造型亦有夾與棒之別。不過，過往的「直髮夾」和「捲髮棒」的概念界線已愈來愈模糊，皆因現時最潮的，可是一物幾用的多用途美髮器。
第1誡 頭髮冇Take 2
正所謂「水能載舟亦能覆舟」，熱力雖可令頭髮變形，但過熱的話就會破壞頭髮組織，以一陣火羅味宣告燒燶。而磨沙面板比亮面面板傳熱速度較慢，有助維持適中溫度，減低燙傷頭髮的機會。
第2誡 髮質莫強求
做人硬係「隔籬飯香」，髮型有得揀，髮質卻天生，幼細一群想豐厚，粗硬派又羨慕人哋夠柔滑。計我話，既然改變唔到，心思都係留在造型上！捲髮器一般可釋出150℃~200℃，髮質粗硬度愈勁，選用溫度就要愈高。
第3誡 平面有着數
想髮型好睇，最緊要夾得有條理，除了講手勢，面板摺合時有冇空隙都好重要，平滑度足才能將熱力平均分布到頭髮上，使效果一致。同時，其面積大小亦直接影響它可承受的髮量，唔夠大的話就未必足以造出豐盈感覺。
第4誡 做足安全措施
為了保護頭髮，事前都會塗抹修護產品，當中一般都含有水分或油分，令雙手變滑，如果隨後立即上手夾頭髮，便有機會跣手，故手握位有冇凹凸設計便成保障關鍵。而面板旁邊的加闊膠體，就可保持與頭皮之間的距離，成為另一隔熱重點。
第5誡 接駁不能太鬆太緊
話明係夾，當然有個交接骹位，但根據力學上的槓桿原理，這絕對是個費力設計，唔想夾完一身汗，骹位決不能太緊，但若然太鬆，唔使出力都自動夾埋的話，用起來就更麻煩。所以，足夠輕輕維持其兩臂張開狀態的鬆緊度就為之最Perfect！
第6誡 操作要就手
每次夾髮可能都要花15~20分鐘，若然美髮器的設計仲要繁複又費時，相信追求簡單直接的潮人定必耍手又擰頭，夾多兩次就將之打入冷宮。一按即着，加上一抽一套就能換頭轉造型的設計，才是真正的待客之道。
第7誡 玩法愈多愈好
為屋企添置一個美髮器，無非想隨時改變造型，既然衣着打扮日日不同，造型當然都要配合番。如果一個美髮器可同時提供直髮、中卷、大卷、超大卷及蓬鬆髮型的配件，基本上就係要乜有乜，知足矣！
數字人生
2012年被《Out》雜誌評價為「美國50大同性戀男女」，排名14。
2013年正式離任Louis Vuitton藝術總監，結束16年賓主關係。
出生紐約的時裝設計師，現年50歲。
2010年被美國《時代》雜誌選為100大全球最具影響力人物。
1993年成立同名個人設計師品牌。
1997年被委任為Louis Vuitton藝術總監。
撰文：謝萃敏
部分攝影：郭凱敏
查詢電話：（a）2733 3888（b）2751 4604（c）www.ghdhair.com