雖然Wii U主機銷情告急，但唔代表遊戲質素變差，正如本周推出的《Donkey Kong: Tropical Freeze》就幾吸引。它除了屬系列作中首隻高清遊戲，主角Donkey Kong更會聯同幾位拍檔，上天下海決戰維京生物；儲夠香蕉仲可合力使出必殺技將敵人消滅，自己單拖解悶或同朋友夾份出「蕉」，一樣咁好玩！
相比其他任天堂經典遊戲，《Donkey Kong》系列算是曝光率較低，上集家用版遊戲已是4年前的《Donkey Kong Returns》，當時仍是標清嘅Wii年代，到今集《Donkey Kong: Tropical Freeze》就名正言順成為系列首隻高清作品，畫面表現自然高出幾班。角色方面，除咗猩猩王Donkey Kong外，其家族成員亦粉墨登場，好似久未現身嘅Diddy Kong同佢女友Dixie Kong，以及首次成為可操控角色嘅Cranky Kong。玩家於遊戲時需操控Donkey Kong，再從其他3個角色中揀選1位做拍檔。
今集故事講4隻猩猩在熱帶海島慶祝Donkey Kong生日時，突然畀維京海盜船偷襲並將全島冰封，所以Donkey Kong同3位拍檔決定反攻重奪家園。遊戲收錄了6個海島舞台，每個島嶼都有唔同風格，由最初叢林一路打到滿布紅葉的秋日版圖，再直踩熱帶雨林、水底世界到最後兩關嘅冰封世界，挑戰北極熊、維京企鵝同海豹等Snomads生物。值得一提，今集Donkey Kong首次學識游水，可於水底一邊游一邊作出攻擊。佢仲識得拎起敵人擲出攻擊，或者從地下抽起重物，話唔定會發現隱藏秘道同寶物！
玩家可能會覺得新作風格有啲似《孖寶兄弟》，其實兩者同樣由田邊賢輔製作，有似曾相識嘅感覺都唔奇。新作加入了載具設定，角色可乘坐礦車、木桶火箭等移動，不過動作太快隨時會撞親。至於必殺技係今集遊戲精髓，只要儲夠100條蕉便可觸發Kong-POW能量計，和拍檔合力發動必殺技，一次過掃低畫面敵人。當單打時出招，拍檔仲會喺必殺技後送出不同道具，如拍住Diddy Kong會得到Life Balloons，Dixie Kong會有Golden Hearts，而Cranky Kong則送Banana Coins，所以話拍檔好重要！
類型：動作
開發：Retro Studios
平台：Wii U
推出日期：2月13日
售價：約$400
查詢電話：2359 7998
撰文：布偉倫