情人節，除了是男士與伴侶享受甜蜜時光的日子之外，其實更像是一年一度的考試時間；事關為女伴送上一份稱心又如意的情人節禮物，少點腦袋、心思、眼光都不可。常說女人心如海底針，要份禮物氹得她開心，除了誠意要夠，仲要多聽多睇，情報要夠多夠齊，先可保證一擊即中，攻陷她的心！
很多女生都鍾意拍攝即影即有相片，不過拍攝時只能一Take過，影得唔好都幾浪費相紙。好在Fujifilm剛剛推出一款用上即影即有專用相紙的無線打印機Instax Share SP-1，用Wi-Fi跟手機連接下即可印出手機內相片，有心思的話還可作簡單執相及加入拍攝地點、時間等資料，實用又好玩。
女生趨之若鶩的「自拍神器」Casio Exilim EX-TR15，近期推出了深海藍色限量版，不過有冇機會買得到做禮物，就要睇大家的誠意啦！TR15採用360o旋轉外框設計，取景自拍想點都得；而且相機新增12級美白模式，自拍時又白又滑，女生冧爆。
女生們視手袋為戰友，每天出雙入對，重要程度可謂與男朋友差不多。若然你夠體貼，花點手筆為她送上貼身的手袋，令她在人前有面子，人後必定會有好回報！
來自瑞典的a-JAYS設計簡約，而且諗頭多多，如新推出的a-JAYS Five手機用入耳式耳機就設有iOS、Android、Windows 3個平台版本，無論使用哪種智能手機都能找出合適的型號。a-JAYS Five音色不錯外，還設有黑、白兩色任選，想自製浪漫情侶組合一人一對耳機都得，而且花費無幾。
5吋Android手機？看似未算突出，但勝在這款法國新品牌SUGAR手機就以機側鑲滿Swarovski閃石做賣點，以人手鑲滿129顆閃石，還備有純白及粉紅兩色選擇以及800萬像素前置鏡頭玩自拍，女生一定大愛！
藍芽喇叭選擇多不勝數，想揀款與眾不同，可考慮這款Bling Bling閃爆JBL Pulse喇叭。JBL為音響大牌子，音色毋庸置疑；而這款圓筒形設計Pulse喇叭的機面更裝滿LED燈，可自訂顯示圖案外，還跟隨音樂節奏變色，開派對或氹自己開心都合用！
為女士送上化妝品作為禮物，驟耳聽來不是個聰明的選擇，但若果是shu uemura的裸妝眼影盒，就另當別論，即是間接話她淡妝上陣都已經令自己神暈顛倒！
自古以來將女士比喻作花的例子多不勝數，皆因兩者都有着無比亮麗的外表，而且她們的芳香與韻味都令人難以忘懷；為她送上一支充滿天然花香的香水，就像在稱讚她人比花嬌，即使花香亦只能當作陪襯一樣。
撰文：布偉倫、黃佩琪