東方有貴氣 風生又水起

甲午年整體運程

寶源師傅話甲午年，天干屬陽木，而地支屬陽火，火在下，上面堆滿柴枝，火勢一發不可收拾，加上天干地支都屬陽，剛氣充盈，事件一發生就來勢洶洶，猛烈非常之象，五行中火只能用土洩，而土代表市民大眾，所以無論政治、經濟、衞生出問題，都是由小市民受苦受災。由於火旺自然剋金，而金代表政府，所以政府無論任何施政都會處處受制，木代表學者和政客，他們亦不好受，惟有用水即經濟手段才可緩解，所以甲午年是大家都辛苦的一年。師傅奉勸年中勿往火重的地方聚集，勿亂追趕潮流，明哲保身最重要。

最佳出門時間

睇完香港運程後，今日出門又點安排呢？今年初五才立春，所以初一其實仲係蛇年，但今日亦係不錯的一日，是日宜求財、祈福、求子、祭祀、出遊同拜年，喜神和財神都在南面，而福神就在東南，貴神就在正東，出門先選這三個方位走走，吸吸靈氣就最好不過。至於最佳時辰，如果要上頭炷香，由子時開始到未時都係好時辰，即係半夜11點，到下午3點。至於出門拜年時間的選擇好多，由早上7時至下午3時都可以，留意3點後時辰不太好，如要去親友家吃晚飯，師傅建議早點出門，但如果一定要喺唔好嘅時辰出門，建議向南或東方走個大運，吸收一吓吉祥之氣，自能化解一切禁忌。

要上頭炷香嘅朋友，由子夜十一至下午三時都係好時辰！	向南方走至一些銀行提款機前，攞少少錢嚟借運，寓意財源廣進！	着紅色衣服朝正東方走，有助提高升職運。

增運招福有方向︰財神走正南

立春後九宮飛星嘅財位，落喺正南方，而初一日財神和喜神亦在正南，所以朝正南走，定能吸納財氣，但要小心今年嘅太歲位亦喺正南，借運時要安靜，因為太歲最怕動，所以勿大吵大鬧，靜靜朝南方走至一些銀行提款機前，大人可提款一百元放銀包內，象徵借到財氣，招財進寶，小朋友則每人多發一封利是，寓意一家都皆大歡喜，財運亨通。

貴神在東方

想求取升職加薪嘅朋友，一定要有貴人幫助才能成事，而年初一貴神坐落東方，要借貴神運，同樣有些小秘訣，就係要着鮮色衣服，紅噹噹嘅顏色就最好，出門向正東走，以紅色吸納貴氣，效果倍增，最好走至大商場或高樓大廈，搭電梯上頂樓，寓意步步高陞，到達後記住遠望窗外風景，讓自己目光遠大，再吸吸靈氣先至好落樓。

送禮預測運程

拜年時少不免送禮物，而大年初一首份要送的禮物，原來可從中預測到你今年嘅運氣。

洋酒	糖果	海味

水果：很多人送禮都會買水果，水果五行屬木，選送水果表示今年工作不斷，但回報有限，只能不斷付出，亦因此要小心身體和心理造成強大壓力。

洋酒：見長輩時常買的禮物，由於酒味辛辣，五行屬金，表示你今年工作有心無力，欠缺方向，就算多努力付出只能事倍功半，要冷靜思考問題所在。

餅乾：係最大方得體嘅禮物，由於製造要用火烤焗，五行屬火，表示你今年鬥志高昂，好想大幹一場，闖一番事業，雄心勃勃嘅你，記緊要量力而為。

糖果：好多人都會買嚟送畀小朋友，由於味甜，五行屬土，表示你今年一切順心如意，經常有意想不到嘅驚喜或收入，但要存感恩之心，好運才會循環不息。

海味：初次見家長嘅朋友一定會買，話明海產，所以五行屬水，今年構思多多，但苦無表現嘅機會，惟有等待等待再等待，要踏入秋冬季，運程才會有轉機。

拜年五不

一：不可以亂講嘢，特別係唔吉利嘅說話，如果小朋友講咗啲唔吉利說話，要講百無禁忌、童言無忌等，更唔好即時教仔破壞氣氛。

二：不可以打爛嘢，萬一打爛咗嘢，要講番啲好意頭嘅說話，之後記住勿爭住清理，因為各處鄉村各處例，應由主人家決定怎樣去清理。

三：不可以向主人借嘢，借錢當然唔可以，但原來借火都唔應該，所以有煙癮嘅朋友就要留意，借刀、借剪等金屬物品都不能借。

四：不可以瞓覺，就算幾攰都好，都咪喺人哋屋企瞓覺，初一日「晝寢」，除了自己招霉運外，還會令主人走運，大家要切記！

五：不可以醉酒，自己開車嘅更要滴酒不沾，不用開車嘅亦建議適可而止，量力而為，人人都開開心心，別因為飲醉酒而敗興而歸。

撰文：余家洋、布永德

攝影：陳世昌

模特兒：Carol、Anna、Ivy、Moona@Ice Agency

鳴謝：玄學家寶源師傅