Chain Bags女生百寶袋
所以話女孩子天生就負擔重，無論你習慣幾瀟灑幾輕便都好，點都要帶個隨身的細袋仔。像男孩子的隨身物，五隻手指數完，銀包、鑰匙、手機，4個褲袋綽綽有餘；但女生們的隨身物多不勝數，要將「碎濕濕」的小物統統藏起，古代有繡花錦囊，中世紀開始就出現手提包（即是Clutch的雛形），但講到尾都要騰空一隻手，始終是相當不方便！直到Chain Bag的出現，這條鏈帶更啟發了不同上膊手袋的出現，到底其魅力何在，看完解構大全你就知！
第1誡：肩帶Magic
Coco Chanel在設計Chain Bag時，已經幫大家行多一步，將肩帶設計成圓形的鏈帶，想要斜孭就拉長變單帶，兩條帶並拉就會縮短變成雙帶，大部分Chain Bag都保留這個設計，可長可短，襯衫都容易啲，而且唔覺唔覺仲以為多咗個新袋添。
第2誡：皮鏈夠串
解構Chain Bag點可以唔提條Chain呢？Coco Chanel當年的設計靈感源自家中後花園的圍欄，將皮革穿過鏈帶，就好似圍欄交叉的編織方法，造出像緞帶般的造型；時尚大師半世紀前就識得將兩種不同的物料一併使用的Mix & Match，實在要畀個Like。不過，好多Chain Bag依家都變成純鏈帶設計，所以話要分高下就係睇細節位。
第3誡：呵護膊頭
就算行裝幾少都好，袋本身都有一定的重量，孭足全日都咪話唔攰，所以Chain Bag的帶多數會有一部分用上皮，等孭上膊時卸少少力。
第4誡：保險實扣
細袋最驚畀人扒，但又想要型喎，所以就要識揀！Chain Bag的扣種類繁多，穩陣的就有十字扣，放多點東西都不怕會跌出來，用磁石貼款的朋友，就惟有自求多福、小心財物啦。
第5誡：五臟俱全
Chain Bag的體積未必可以夠放下長銀包，僅僅可以將卡、錢、鑰匙等等雜物統統塞入去，但一大堆物品雜亂無章咁放，始終有啲唔就手，有分格或者拉鏈的內籠就馬上加分，格開貴重財物尤其重要。
第6誡：透視誘惑
四四方方的Chain Bag堪稱經典款式，但潮流不停變，能夠將潮流元素加入先叫走在時尚的尖端。今個春夏大熱的透明及Animal Print，Chain Bag又點會走漏眼，兩者Mix埋一齊，大玩視覺反差，就算袋內東西一覽無遺又有咩所謂。
第7誡：抵死造型
啱啱先講完Chain Bag四四方方，但又再次印證潮流係無界線的，Chain Bag都可以來個大變身， 例如將指甲油、香水瓶放大，再變成小包，最抵死就係條鏈帶可以拆出來，變成Clutch，兩用就最啱多變的潮人啦。
新潮Remix
Chain Bag源自時裝大師Coco Chanel，就是她發現每次自己單手提着手袋時，想大動作啲都唔得，於是想出設計肩帶，將手袋孭上膊頭，雙手就可以空出來工作。這個設計念頭影響非常深遠，更令女性形象煥然一新，想優雅的話照舊手提包包，而斜孭則增添率性帥氣的感覺，最重要就梗係女士購物時斬獲就算再多，都唔會冇手攞。時至今日，Chain Bag變化多不勝數，將新舊元素Remix再Remix，大勢所趨令女士點都要有個跟身，最好就學埋以下誡條，Talk得出先至配得上潮人稱號！
數字人生：Riccardo Tisci
畢業後的第5年已經擁有自己的同名品牌。
家中有8位姐妹，Riccardo是家中唯一的男生。
2013年獲得時裝界的極高殊榮——CFDA Fashion Awards的International Award。
以僅32之齡擔任Givenchy全線的創作總監。
1974年在意大利的塔蘭托出生。
與Nike首度合作推出的Air Force Hi Boots定價為$225美金。
撰文：葉伊霖
部分攝影：陳富權
查詢電話：（a）2887 2138、（b）2972 2115、（c）2522 8782、（d）2644 1498