城中名廚Harlan Goldstein致電說：「我開咗間新餐廳叫做Comfort，你過嚟試一試啦！」他開到口，我當然要去捧場。
Harlan擁有米芝蓮餐廳，但近年令他不斷見報的，卻是關於減肥，他十分自豪地告訴我：「喺14個月內減咗86磅，係唔係好堅呢？」自此之後，不少人跑上餐廳要求他提供減肥貼士、運動方法及瘦身菜單，他說：「我話畀佢哋聽，千祈唔好講畀人知我教佢哋，直至減肥成功 —— 萬一佢哋偷偷食嘢又唔做運動，然後賴咗我，咁仲得了嘅！」
肥胖多年，為何忽然立下決心？他說：「有次返老家，畀家姐話我太肥，然後阿媽又話我太肥。我唔知點解，一時感觸，匿埋喺房度喊咗成半個鐘，起勢鬧自己冇鬼用，跟住就嚟啦……」連他自己也莫名其妙，但人就是這樣奇怪，心裏有很多事情好想做，偏偏行動上永遠配合不來，直至時間到了，靈光一閃，你就會自動瞓身去做。
我問Harlan：「你有錢有事業，但係有冇發覺到，快樂其實係建基於好基本嘅嘢，例如健康？」他笑說：「我其實冇乜錢，不過自從減肥後，身體健康咗好多，日日精力充沛，的而且確比以前開心好多。」
新餐廳的名字，顧名思義是主打他的家常Comfort Food，雞翼、芝士、Pizza、燒大蝦、咖喱牛腩、意大利粉共冶一爐，但經營這種生意怎樣Keep Fit？他笑說：「咪係，為咗新餐廳，又肥番4公斤。」看來，減肥是終身任務。
網址：www.chan-wai.com