朋友B在社會打滾多年，以為見盡人生百態，但自從在新開張的糕點麵包店擔任店長，方發覺一樣米養百樣人，萬樣米就養出億樣人。
今天來了三位個人遊少女 —— 姑且統稱「福祿壽」，她們看到馬卡龍做特價時，福：「點解馬卡龍咁平嘅？」祿：「咁平點得o架？」壽：「咪係囉！咁平點算喎？」三位少女就這樣你一句我一句在朋友B面前好Kawaii地印來印去。
朋友B笑笑口說：「咁你哋可以畀多1倍錢嘅……」福祿壽嘻嘻哈哈覺得朋友B都好Kawaii，但既無意付多1倍錢，亦根本沒打算購買。福：「我好怕甜。」祿：「我家人都好怕甜。」壽：「我啲朋友都唔鍾意食甜。」
朋友B立即指着遠處的貨架說：「曲奇是鹹味o架！」福：「邊款好食？」朋友B：「杏仁味最好。」祿：「好啦，要80包啦！」朋友B：「80包？我冇咁多貨喎，配搭其他口味得唔得？」壽：「唔得。」朋友B：「我叫工場立即送過嚟啦，你哋可唔可以等一陣？」福：「我哋就嚟要走。」朋友B：「你哋趕時間？」祿：「又唔係。」朋友B：「……」壽：「等我哋諗吓先。」
三位少女坐在一旁，福在玩手機，祿和壽在把弄絲襪邊立體喱士花花，然後在店內左挑右選，結果買了千多元東西，三人說：「唉，都唔知買嚟做乜，但又想買啲嘢。」說罷便離去。朋友B以為剛才是王祖藍、阮兆祥、李思捷聯合表演。
網址：www.chan-wai.com