Gear Vs Pebble「錶」機鬥法

Gear傾偈兼影相

GALAXY Gear伴隨Note 3喺柏林登場，當時機Gor應邀出席發布會，起初見佢可以連繫電話傾偈、睇短訊兼影相，既興奮又Surprise，但當廠方話暫時只支援Note 3，就勁多人唔睇好，結果銷情受到影響。

不過機Gor收到風，呢隻錶現已支援同廠Android 4.3機款，如GALAXY Note 10.1新平板等，人氣隨時彈起。

無論充電定同手機配對，Gear都要「笠」番個Jacket。	Pebble售價：$1,298（b）	磁力充電接口喺錶身左側，另可見多枚操控按鈕。

規格表

處理器：ARM Exynos

屏幕：1.63吋Super AMOLED（320×320解像度）

顏色：黑、米、灰、橙、綠、玫瑰金

體積：56.6×36.8×11.1mm

重量：73.8g

Pebble集資破紀錄

很多人創意滿分，可是苦無經費實行計劃，造就了Kickstarter私募網站誕生，由網民集資生產Gadgets，開站至今已有近50,000件搞鬼產品面世，Pebble便是其中之一，仲收集到成千萬美金，破盡紀錄。

Gear可經NFC跟Note 3連接，可惜要先將錶底拍落機背配對，都幾「論盡」。

Win 單撈《Pebble》App便可經藍芽連接手錶，以iPhone配對勁靈敏。

點解咁成功？機Gor認為佢勝在支援Android同iOS兩大平台，由第三方開發嘅Apps有無限發展潛力，以後肯定大把嘢玩。

Win 用Gear講電話時要將錶帶放喺嘴邊，而錶帶更內置鏡頭。

Pebble嘅來電通知及短訊都有震動提示，弊在原生唔支援中文。

規格表

處理器：ARM Cortex-M3

屏幕：1.26吋E-paper（144×168解像度）

顏色：黑、紅

體積：50.33×32×8.44mm

重量：38g

計步功能知多啲

智能裝置大多內藏「震動傳感器」，能感測人體移動時產生嘅震動去計算步數、步距等，從而推算卡路里消耗量。以Gear為例，便支援3D感測全方位移動，毋須像舊款計步Gadgets般掛於腳部都咁準確。新一代手機如iPhone 5s，更植入Motion Co-processor以硬體收集數據。

第1回合：舒適兼容比併

戴錶梗係要輕又要型，雖然Gear金屬錶殼夠Cyber，但戴上手都幾重；而Pebble以聚碳酸脂物料錶身加橡膠錶帶，輕巧得多。再者Pebble兼容Android和iOS兩大系統，以《Pebble》App經藍芽即可連接手機，相比Gear只食到同廠Android 4.3手機，兼容性高下立見。

第2回合：通訊功能測試

兩錶都支援防濺水功能，又有來電提示，甚至可查看手機內的SMS、WhatsApp、Email。弊在Pebble唔支援中文，顯示時統統變晒亂碼，需要加入第三方軟件才能顯示。反觀Gear篤芒介面勁User Friendly，內置收音咪可直接傾電話，而錶帶更植入190萬像素鏡頭，機Gor同Model行街時拍咗段有聲相片，佢即場大讚「卡嘩兒」；唯一要彈係佢嘅S Voice語音指令辨識度一般，喺嘈雜環境使用時往往認唔到。

第3回合：Apps擴充應用

揀智能手錶，講外形鬥內涵之餘，Apps嘅應用都好重要，正如iPhone雖好都要App Store扶持。當中Gear需要啟動《Gear Manager》嚟檢視工具，內有《Evernote》文書應用、《LINE》社交通訊等70款Apps左右。而Pebble除咗有超過40款工具外，仲有逾2,800個Watchfaces介面供替換，機Gor以《Pebble Apps》揀咗個Steve Jobs錶面，仲下載埋《PebMsg》玩短訊，相信第三方Apps會陸續有來。

達人教路：數碼產品代理LRT General Manager Leo：「買錶前諗埋換機！」

「揀智能手錶，最好有良好兼容性，皆因香港人愛換新手機，假如由Android轉做iOS平台後，無法配對手錶便會造成浪費。同時要留意耗電量，部分錶款為了省電，於備用狀態下會暫停一些功能，例如無法顯示時間等，所以選購時應揀慳電又同時保留到基本手錶功能的款式。」

機Gor Report：智能手錶 實用為先

Gear同Pebble嘅功能玩味各具特色，但買得呢類錶都係以實用為先，我要Show Off就唔會戴呢啲千幾二千蚊錶仔啦。以實用和擴充性來看，Pebble都較為優勝，加上佢充一次電可用近一星期，而Gear就要日日拎去充電，所以機Gor今次投Pebble一票。

Profile

機Gor

機不離身，不信Spec只信測試，不扮高深，懶理低俗，貪新不忘舊。

撰文：機Gor

模特兒：Samantha（Reborn Production）

查詢電話：（a）3698 4698、（b）2395 3913