Xbox One搶先試！潮玩聲控

開聲操作方便

雖然歐美、澳洲嘅Xbox One已經喺11月底開賣，但廠方遲遲未公布亞洲地區推出日期，即使喺今次試玩活動都只強調「2014年」面世。在試玩新遊戲前，還有Xbox高層由美國飛來香港講解新機功能，尤其係Xbox One已配上新Kinect感應器，無論鏡頭像素以至辨識靈敏度都有所提升，對聲控操作提供不少幫助。透過新系統，玩家走到遊戲機面前便可自動登入Xbox LIVE帳戶，而且仲可透過聲控操作，例如讀出「Xbox Go Home」便會回到主畫面；講「Xbox Snap TV」即可將電視節目畫面縮小並置於Dashboard右方；在遊戲中叫「Xbox Record That」更可將遊戲畫面錄影，非常方便。

高質賽車遊戲

活動設置了多個試玩台供傳媒體驗Xbox One大作，包括自家賽車遊戲《Forza Motorsport 5》、Capcom喪屍遊戲《Dead Rising 3》，以及以古羅馬帝國為背景的動作遊戲《Ryse: Son of Rome》。《Forza Motorsport》遊戲系列雖然出得幾密，差不多每隔兩年就有新版本，但每集都有驚喜，如今集在光影處理上表現出色，由光暈表現、車身損毀程度至背景細緻度都極具水準，更可將遊戲片段錄低，然後進入Upload Studio剪片作分享。

Xbox One包括遊戲主機、Kinect感應器及新手掣，將於2014年抵港。	新手掣的RT及LT掣加入Force Feedback設計。	Xbox One機背可見HDMI in/out插口，另有Kinect專用端子。

強勁機能加持

喺Xbox香港總部設置多個試玩台，連Model都玩到停唔到手。	《Forza Motorsport 5》賽車逼真小評：畫面細緻逼真，比同類賽車遊戲更為出色。	Xbox LIVE高級市場經理Terry Farrell由美國飛來香港介紹新機功能，當中聲控玩法最有驚喜。
Xbox LIVE加入跟Nike合作的《Xbox Fitness》功能，可玩埋健身。

至於Game迷極為期待嘅《Dead Rising 3》，玩法延續前兩集賣點，要於限時內喺喪屍圍困下逃出生天，利用隨手執起嘅物品組合成武器，小記就試過以鐵釘加壘球棍組合成狼牙棒，打喪屍時勁爽！今集在Xbox One機能加持下，同一畫面會出現數百隻喪屍，現場試玩時非常流暢。至於《Ryse: Son of Rome》本來屬意於Xbox 360推出，但現在留為新機首發遊戲，當然有過人之處，如在CryEngine遊戲引擎強化下，聲畫表現俱佳，配合古羅馬帝國時期的戰爭風格，可拎起長劍盾牌埋身肉搏，更可飛擲長矛作遠攻，亦能觸發QTE使出華麗招式，值得期待。

Xbox One規格表

處理器：AMD八核APU

記憶體：8GB

硬碟：500GB硬碟

對應媒體：Blu-ray、DVD、CD

撰文：布偉倫　攝影：方偉堅　網址：www.xbox.com/zh-hk