Gran Turismo 6虛擬辣跑挑機
PS4行貨仲有個多星期抵港，不過唔代表PS3冇Game可玩，今個星期就有PS3獨佔賽車大作《Gran Turismo 6》（簡稱GT6）。究竟新作同3年前嘅《GT5》爭幾遠？由於佢用上新核心引擎，顯示夜間賽車的反差位更銳利；另收錄逾1,200款靚車及37個地點的賽道，還跟車廠合作開發虛擬車款，頭炮有Mercedes-Benz AMG Vision Gran Turismo，久等嘅粉絲應該收貨！
將機能推至極限
當年PS3主機推出前，《GT5》已定於PS3面世，結果等足幾年先正式賣街；新一集《GT6》就唔等PS4上場，直接登陸PS3。咁幾時先有PS4版？「GT之父」山內一典日前於訪談中表示，《GT7》最快於下年登陸PS4，唔知玩家又信唔信呢？講番今集，開發小組特別以新遊戲核心引擎，將PS3機能推至極限，最大分別是能將光源的動態範圍提升50倍，即是黑白反差位可做得更強烈，夜間飛車效果自然更靚！
追加銀石等賽道
賽車方面，新作收錄逾1,200款車種，由復古車輛、跑車、賽車跟概念車都有，今集還追加全新銀石賽道、阿斯卡里賽道及柳樹泉賽道等，總共有37個地點100條賽道，而且每條賽道跟真實極為接近。遊戲除提供街道模式、生涯模式、車輛改裝及影相模式外，還新增原創的「跑車浪漫旅體育館」模式，可從中挑戰高難度花式及特定賽事，都算有新意。新作亦加強線上功能，追加「社群」讓各位可開群組同其他玩家交流。
虛擬靚車陸續來
遊戲開發團隊更為《GT6》舉辦Vision Gran Turismo計劃，邀請好多知名車廠如Honda、Nissan、Infiniti、Peugeot及Volkswagen等，於遊戲內開發虛擬車款。打頭陣有配備雙渦輪增壓V8引擎的Mercedes-Benz AMG Vision Gran Turismo虛擬鷗翼跑車，底盤以鋁製框架和碳纖零件組成，車身僅重1,385kg，而其他虛擬車款將會陸續登場。大家還記得《GT4》時的Nike ONE概念車嗎？Vision Gran Turismo今次預埋Nike跟Jordan Brand玩，唔知到時車款會幾突破呢？
黃芷晴：「所有設定都好真實，畫面又靚、又流暢。雖然發布會嘅藝人挑戰賽都有炒車，但估唔到會贏到冠軍！」
美棋BB：「以前玩《GT》都用手掣，今次坐上Car Seat玩，感覺更逼真！我好期待新虛擬跑車，肯定會去Download。」
DETAILS
類型：賽車模擬
開發：Polyphony Digital
平台：PS3
售價：$458（普通版）、$412（下載版）、$688（紀念版）
查詢電話：2341 2356
撰文：布偉倫
攝影：胡振文