I Believe I Can Fly 滑翔遨遊

享受天空寧靜

教咗滑翔傘超過20年嘅文錦輝教練，當初機緣巧合接觸這運動，便一試愛上，「有次玩越野單車，剛巧遇到人玩滑翔傘，佢哋問想唔想試，雖然只係短短十幾秒嘅體驗，卻令我對滑翔傘產生興趣，喺天空睇風景好靚好舒服，我亦享受天空帶畀我嘅寧靜。一般人每次滑翔1小時左右，而我最長紀錄就試過喺空中逗留7小時。」點解咁好玩都未能在香港普及？他續道：「香港人成日諗好多嘢，玩滑翔傘會危險，可能會斷腳，斷咗腳又可能無埋份工……外國人想玩就玩啦！」

體力要求不輕

文教練表示，只需年滿16歲並參加入門課程，大約4至6天便可順利飛行，獲取Student Pilot牌照；再完成25次起飛降落和筆試後，便可得到Club Pilot資格單獨飛行。以兩個Pilot課程各$7,000計算，自置埋裝備都係幾萬元左右，消費不算太高。「教咗咁多年以男學員居多，男女比例約為10:1，皆因玩滑翔傘對體力有一定要求。飛上天當然好Free，但飛前要孭近30磅裝備行上山，就算係男仔，每飛一兩次都要休息。」當中還有機會遇到驚險事件，他憶述：「試過有一次風勢好大，諗住緊急降落然後行番去集合地點，點知降落後同朋友失去聯絡，結果喺石澳瞓咗一晚，到第二日頭頂就有架直升機接我。」

滑翔起飛Step by Step Step1 當連接坐袋後，要把降傘放在地上完全展開，並仔細檢查傘繩有否打結，煞車繩有冇問題等。	Step2將左右傘繩扣於坐袋上，下方安全扣需繫緊雙腳，然後雙手握着Front Risers（前方操縱帶）。	Step3當風來時滑翔傘充氣，玩家需要重心向後並保持雙手伸直，利用身體拉起傘，當傘升到頭頂便轉身向前跑起飛。

雙人滑翔先考牌

他強調滑翔傘是一個「玩風」的運動，學員必須了解飛行原理、氣流變化等理論和知識。如果想挑戰自己的技術，除了一般單人滑翔外，還有雙人玩法，但必須先考取載人滑翔傘牌照（Tandem Instructor）。「傳統上控制者會坐於後方，以便觀察前座乘客的舉動，但先決條件係起飛時，前面嘅乘客必須合作—齊跑，遇着啲女士跑唔郁，真係想飛都難。」文教練笑說：「不過飛咗上天，乘客便可用對講機與地上的教練通訊，甚至喺天空facebook打卡都得！」

A.傘袋 B.坐袋 C.保護衣 D.後備傘 E.GPS裝置（左）高度計（右） F.安全帽	學員有Say 譚先生：「以前喺英國玩過降落傘，好嚮往飛行嘅感覺，現時目標係7天內考到Student Pilot。」	Dominic：「我一直玩開潛水，想試一下飛上天空嘅感覺，相比之下滑翔傘嘅消費都唔算好高。」

滑翔起飛Step by Step

滑翔傘起飛方法分為正向和反向兩種，前者適合無風至微風情況，後者是遇上大風時使用，文教練當天便示範了反向起飛法。

裝備先決

整套裝備包括坐袋、保護衣等，價值約$30,000，若保養得好可用上10年。

傘袋：將滑翔傘裝備放於背囊內，方便攜帶。

坐袋：飛行時的座位，讓飛行者可安坐其中舒服飛行，亦具保護作用。

保護衣：用作保護身體，即使於天氣炎熱，也應盡可能減少身體外露部分。

後備傘：副傘作不時之需，起到保命作用。

GPS裝置與高度計：前者提供衞星定位，後者於升降時給予提示。

安全帽：可保護頭部，注意要預留空間擺放對講機。

撰文：蘇雋達　

攝影：胡振文

查詢電話：9620 0577