F1.9光圈SH-01F NightCatch燈飾

近排行經尖沙咀，各大商場已換晒聖誕新裝，係時候出動去影夜景喇！可能DoCoMo都知道夜攝旺季臨近，於新作SH-01F力谷影相功能，不但備有1,630萬像素鏡頭，仲有F1.9大光圈，加上獨有NightCatch模式，喺低光環境下會自動調高相片亮度，影夜景和燈飾就最啱！

大光圈鏡頭

手機攝影功能近年愈嚟愈強，畫質幾乎拍得住DC，SH-01F都唔例外，機背備有1,630萬像素鏡頭，小記試拍時發覺成像銳利，最吸引是光圈升級至F1.9，影散景時比一般日系手機淺景深得多！不得不提新增嘅NightCatch模式，顧名思義是為捕捉夜景而設，用家身處昏暗環境下，系統便會自動推高相片亮度，令影像保持清晰。小記覺得此功能相當實用，相片雜訊既唔會變多又沒有過曝，影夜景大派用場。

IGZO高清屏幕

影完靚相，當然要用靚芒睇相，新機採用Sharp研發多年嘅IGZO屏幕，備有5吋1,080p解像度及440ppi像素密度，肉眼睇靚相夠細緻，而且色水和對比度都唔錯。屏幕另一強項係慳電，廠方稱它顯示動態及靜態畫面時，耗電量分別比上代少50%及90%；喺指定情況下，電量仲可撐足3天！雖然廠商講嘅用法同實際使用情況有啲唔同，但小記以3G上網、串流YouTube兼影相測試，之後待機超過10小時，剩餘電量仲有四成，續航力幾強。

售價：$4,880<br>機身設計略嫌平實，預載DoCoMo LIVE UX介面。

售價：$4,880
機身設計略嫌平實，預載DoCoMo LIVE UX介面。

採用一體成形設計，機背備有1,630萬像素鏡頭。

握機自動着芒

日系手機嘅靚仔外形向來係賣點之一，但SH-01F可能會令大家失望，皆因佢走平實路線，黑色機面、圓角設計，實在過於普通。反而功能就有驚喜，機側兩邊加入Grip Sensor感應器，將手機平放時屏幕便會慢慢關上，用手掌握緊機身即會自動着芒；來電時，手握機身又可將鈴聲音量變小，有Gimmick又實用。硬件方面則採用2.2GHz四核心處理器、2GB RAM，支援IPX5/7防水標準；唯一美中不足係仍未兼容香港4G制式，上網速度慢啲。