商場變聖域水瓶、金牛搶先睇

電視播緊嘅《聖鬥士星矢Omega》，造型實行唯美主義，七八十後嘅粉絲未必受落。想緬懷舊版星矢風采，最近有商場將「聖域」帶到現實，除了備有大量珍藏展出外，聖衣神話EX與港產Kidslogic新作更率先亮相。同場備有巨型電鍍星矢畀大家拍照留念，仲有機會見到Cosplayers扮演十二宮聖鬥士，粉絲豈能錯過！

必影靚位奧義場景

位於Mikiki商場中庭的展覽場地，以希臘式圓柱布置成「聖域」模樣，分成生命鐘樓、嘆息之牆等展區。當中最精彩要數黃金聖鬥士玩具嘅出招場景，如天蠍座米羅嘅「深紅毒針‧赤色巨星」、射手座艾奧羅斯嘅「原子奔雷」、山羊座修羅嘅「聖劍」等，每個場景都有奧義招式特效，影相夠霸氣。而首度亮相嘅聖衣神話EX金牛座阿魯迪巴嘅「巨型號角」，同埋水瓶座卡妙嘅「曙光女神之寬恕」場景，聖衣加入雙金色拉花浮雕，加上頭盔設計精美，完全保留到原著神髓。

港產雙子 Cosplayers撐場

不僅聖衣神話EX可以率先欣賞，連港產Kidslogic嘅Q版雙子座撒卡亦首次亮相，睇啱仲可以即場預訂！原著中華麗嘅雙子座聖衣，獨特嘅雙臉頭冠，玩具都跟到足，配合備有精緻圖案嘅磁力發光台座，做座枱擺設一流。玩具有睇頭，放喺「聖域」正中嘅巨型天馬座星矢更正斗，它與動漫節見過嘅版本不同，聖衣由象牙白改成電鍍銀，氣勢Double Up！而且於12月指定日子，仲有Cosplayers扮成雅典娜同十二宮聖鬥士現身撐場，龍友們記得帶多啲記憶卡呀！

假人馬黃金聖衣全球只得500套，非常珍貴。

聖衣神話EX金牛座比例魁梧，阿魯迪巴表情逼真。

激罕玩具朝聖珍品

「聖域」後方有一個以星空布置嘅暗室，原來內有乾坤，大會搜羅咗本地粉絲嘅星矢珍藏，除了初版聖衣大系玩具外，最難儲齊嘅暗黑聖鬥士都會展示畀大家睇，仲有超罕見嘅假人馬聖衣連場景Set，全球只得500套，真係有錢都買唔到！加埋平時少見嘅星矢卡式音樂帶連公仔書、原作者手稿、東映動畫配音劇本、各式遊戲帶等，令人目不暇給。