三千有找！Yoga Tablet書卷味濃

iPad Air炒唔起，搞到一眾果農變晒大閘蟹，究其原因，欠新意是也！比起歷代iPad都差唔多樣，Lenovo新出嘅Yoga Tablet明顯有創意得多，罕有地引入書卷形設計，手握、直立、傾斜擺放都冇問題，而且Size似足本書兼定價三千有找，各位預算唔多嘅話不妨諗諗！

售價︰$2,499（8吋）、$2,999（10.1吋）

卷軸設計手持舒服

平板電腦玩咗咁多年，外形大多係平面方角，最叻都係偷輕偷薄，冇新意之餘，單手揸機時重心向外，搞到隻手好鬼攰！Yoga Tablet特別把機底設計成書卷一樣，並把全機最重嘅零件如電池放於卷軸中，重量偏向手腕，單手拎自然更舒服。另外，卷軸背後設有可調校角度嘅金屬支架，方便用家把平板座枱擺放，又或微微傾斜平放起來，使用模式話變就變，煲劇、打字都咁自在！

真書感覺可視角高

講尺寸，新機備有8吋及10.1吋兩種Sizes選擇，機身同樣以激光蝕刻技術製造，手指紋冇得留低！重量則分別為401g及605g，以平板來說絕對輕盈，當中前者更如一般小說咁細，單手拿着閱讀，頗有真書感覺。惟屏幕是較失色一環，解像度得1,280×800未免過於落伍，幸好其可視角度達178度，並懂得因應機身擺位而調整光度及清晰度，例如直立睇片時推光，手握閱讀時調暗，通宵睇書都唔怕傷到雙眼。

最薄處僅3mm，比iPad mini仲要薄！

10.1吋型號設有專用無線藍芽鍵盤，支援隔空打字。售價︰$599

前置立體聲喇叭，聲音向前輸出不受阻隔。

耗電量低影相遲滯

硬件方面，定價三千有找就別預期有頂級配套，大腦是國產機常用的MT8125 1.2GHz四核心處理器，並搭載1GB RAM，一般工作睇戲尚算夠用，但影相就有點遲滯，加上鏡頭得500萬像素，令人影相意欲大減。電池則分別有6,000mAh及9,000mAh，小記試玩兩機近一個鐘，電量也只是跌了5%左右，耗電量不算大；廠方稱10.1吋型號續航力可達18小時，比iPad Air仲要長氣。