達人傳授心法 毅行操山
跑山，體能及心理的嚴峻挑戰，可是香港偏偏有很多人鍾意攞苦嚟辛，每逢假日到山上疾走，令越野跑山賽蔚然成風。最出名當然要數下月舉行的樂施會毅行者，近期可見參加者都爭取時間到麥理浩徑「操山」，弄得日夜人頭湧湧，好不熱鬧！然而操還操，若心態和身法唔正確，莫講話要做出好成績，連完成賽事也勉強。今次請來曾三奪香港毅行者冠軍的KK（陳國強），教大家操山必殺技！
心法１：身體記住節奏
秋天是傳統跑山旺季，除了毅行者，接下來還有至少5個長距離山賽舉行，冇一技傍身點樣成事？「跑山係一種節奏嘅訓練，放軟身體及肌肉，自然地擺手同提腿，令身體記住這節奏，比賽時自然可用番出嚟。」KK補充，落山是最容易受傷的地方，身體重量加上速度及山坡斜度，對膝關節損耗甚大，因此落山時應以75度打側落，以減低受傷機會。
心法2：夜行上山落山
步姿正確，策略亦同樣重要。以毅行者為例，KK指最多人放棄是CP3至CP8這段路，「由北潭坳到荃錦坳，都係夜行兼上山落山，高低幅度達800米，若早段太早發力，嚟到呢度好難捱落去。」佢提醒初參加者，比賽前應多練習夜行路段，以熟習地形，無論跑多少公里，亦應在完成賽事六成路段後才發力，「好似慢火煎魚咁，切忌催谷自己，並時刻抱住會出事嘅心態嚟跑，咁樣反而更少出事。」
心法3：四人八腿一心
跑山賽事大部分都有補給站，如何善用屬關鍵所在，食得太飽或完全空肚都不適宜，並應避免喝大量清水，「跑山時脫水在所難免，但若一口氣喝下太多，不但會令胃部脹住唔舒服，仲分分鐘嘔番出嚟。」盡量多喝帶甜或帶鹹的飲料，以補充糖分及鹽分。另外，要時刻跟隊友溝通，即使去洗手間亦要通知大家，減低眼瞓出錯機會。「『四人八腿一條心』互相鼓勵之餘，我最鍾意講隊友有興趣嘅話題並專登講錯，等佢糾正我從而抖擻精神。」
心法4：累積里數經驗
雖然毅行者已截止報名，但有心唔怕遲，若想下年挑戰自己的話，現在就要開始準備！KK指，入秋後是初學者行山的最佳季節，可試行西貢水浪窩至慈雲山路段，又或城門水塘至大帽山一段，兩者地勢較平坦且風勢較大，涼風送爽會行得較舒服。之後，明年3至11月期間就要周期性地練習，令身體適應速度及累積里數，這時更要定下時間目標，保守者可定於28至37小時，進取一點則可定於20至27小時完成100公里賽事。
教室延續理念
於山野疾走，腳掌交纏於泥路與綠草之間，跑過山的人都知辛苦，但帶來的快感卻非傳統跑步可比擬。KK正是其中一位被這快感吸引的人，他早於1996年參加毅行者，「以前贏的大多是啹喀兵，那時後生心雄，心諗冇理由輸畀佢哋，於是1997年開始狂操。」結果如願以償，接下來連贏了1998~2000年冠軍，2006年更奪得澳洲、新西蘭分站首名，亦因此獲政府頒發嘉許狀。「以前追時間儲里數（km路程），後來發覺毅行者目的是籌款做善事，若單單鬥名次，很多人做到成績後便唔再玩。」他遂於2010年成立毅行教室，旨在教導山友正確心態，並提供專門訓練，最重要是延續理念，鼓勵更多人參與。
源於啹喀兵
樂施會毅行者原是駐港啹喀兵的訓練活動，首屆於1981年舉行，近年發展成國際籌款活動，於澳洲、日本等15個地區舉行。香港站將於11月15至17日展開，有近1,200隊、約4,800人參加。
首見猛龍隊
毅行者對體能有極大要求，健康人士也未必應付得到，但今年卻首次有視障及聽障人士組成「猛龍隊」，由患有嚴重弱視的隊員吳家麟領軍，挑戰在30小時內完成100公里路程。他指出︰「就算一般人覺得困難嘅事，殘疾人士只要堅持嘗試，都可以做得到。」
查詢電話︰（a）2147 0800、（b）2117 1810
撰文︰陳志滔
部分攝影︰郭凱敏（部分相片由受訪者提供）
模特兒：Miki