5.9吋 One Max 奉指玩App

Amanda S.近年轉戰飲食界，經常會用手機Save低生意資料，萬一資料外洩都幾麻煩，難怪佢話諗住轉用HTC One Max，皆因新機植入指紋辨識器，只要用手指一掃機背即可解鎖和開指定Apps，比傳統以圖形或密碼開機更方便同安全，佢嘅靚相和秘密就唔怕畀人偷睇啦！

5.9吋 One Max 售價︰$6,198<br>內置UltraPixel鏡頭，下方為指紋辨識器。

5.9吋 One Max 售價︰$6,198
內置UltraPixel鏡頭，下方為指紋辨識器。

辨識器靈敏

近期iPhone 5s等新機一窩蜂玩指紋辨識，One Max都唔輸蝕，特別於機背鏡頭下方加入指紋辨識器；用家可預先喺手機記錄最多3組指紋，之後輕掃機背即可解鎖或者開啟指定Apps。小記試用時，發覺用左右手食指嚟解鎖都好就手，而辨識器靈敏度幾高，基本上手指一掃已完成認證。另一要讚係記錄指紋過程比起iPhone 5s嘅Touch ID直接，唔使將手指左壓右壓，又可任揀10隻手指做認證，簡單得多。

全高清細緻

驟眼睇One Max，可說是同廠新HTC One嘅放大版。用上金屬機身及BoomSound雙前置喇叭；屏幕尺寸則加大至5.9吋，Full HD顯示細緻兼亮度高，小記試用《myTV》重溫高清版《法外風雲》，大芒效果似足喺電視睇咁爽。亦因為屏幕變大，機身體積都變得巨型，令其重量增至217g，都幾墜手。此外，新機唔再用一體成形設計，背殼部分可拆開，方便更換microSD卡，擴充容量話咁易。

5.9吋大芒配合BoomSound喇叭，聲畫效果超正。

背殼可隨時打開，換SIM卡和記憶卡都好方便。

自製微電影

招牌嘅HTC Sense介面亦有所更新，新機採用Android 4.3系統加Sense 5.5介面，較特別係BlinkFeed動態首頁，可同時接收多個地區新聞及社交網絡，香港、台灣、美國等地都有，十足一個新聞中心。另強化Video Highlights功能，以往只可製作最多30秒短片，兼限制音樂及相片風格，依家統統有得轉換，用家亦可直接於App內剪輯音樂，隨手整段微電影都掂！