180度Flip芒 ZR1200自拍有計

提起自拍，大家可能會諗起Casio嘅「自拍神器」。不過出面炒到過萬元，唔想捱炒價又想將自己最靚一面Show畀人睇，現在終於有計！皆因廠方推出另一款自拍相機ZR1200，特別加入180度Flip芒設計，等各位自拍時可以校啱位，仲有美顏和美白功能，配合新增的五軸防震系統，自拍靚相穩定過人。

售價：$3,380

12級美顏美白功能

女士們玩自拍，都喜歡化晒妝上鏡，務求以最佳狀態示人，與其勞師動眾，不如用ZR1200自拍會簡單得多。新機備有美顏和美白功能，仲支援12級程度調校，毋須自己動手化妝或執相，即可塑造出嫩滑肌膚，抹去臉上原有細紋，不過小記覺得12級強度「味精」太濃，6級左右的效果最為自然。新機還植入3吋180度翻芒，最特別是機背設有小腳架，方便支撐於平面上，配合揮手自拍功能，向住屏幕一揮手即可啟動倒數拍攝，畀足時間各位擺甫士做表情。

搭載五軸防震系統

一般人高抄自拍，都會以單手持機，但單手操控難免會出現搖晃，張相隨時鬆郁朦，故新機搭載五軸防震系統，有效修正5個方位造成的震動，配合高速連拍合成，可達致4.5級防震效能，以後無論自拍、影夜景都唔怕手騰腳震。規格方面，它擁有1,610萬像素CMOS，結合新型EXILIM Engine HS 3影像處理器，支援ISO 3,200感光度；若配合高速夜景模式，更可達至相等於ISO 25,600高感光度效果，加上備有24mm廣角12.5倍Zoom鏡頭，無論遠景近景都能一鏡盡覽。

轉盤新增了TL（Time Lapse）模式，可玩到縮時攝影。

機背的按鍵鋪排唔算複雜，只有幾個掣和一個轉盤。

快鏡般的縮時攝影

雖然新機主打自拍，但其他功能同樣值得關注，尤其是順應潮流引入縮時攝影（Time Lapse）功能。近期不少人玩疊相，製作日出日落、花朵盛開甚至颱風來襲等快鏡影片，相比之下ZR1200的縮時攝影就易用得多，可設定最長間隔為30秒，而總拍攝時間則可設至無限，毋須後製即可拍出過癮短片。此外，新機仲可玩埋慢鏡拍片，支援每秒1,000格的影片攝錄，然後以超慢鏡播放影像。