到底美斯定C朗勁啲？早前兩位球王喺歐聯分組賽首場各入3粒，平分秋色，但喺足球遊戲《FIFA 14》中，美斯能力值達94，比C朗嘅92高少少，唔通同今集美斯係封面人物有關？爭論無謂，踢波最實際。《FIFA 14》物理系統比上集改進，如球員煞停轉向、射波動作都更合乎實際情況，而且食身位搶波變得更重要，現代足球身形單薄啲都好蝕底！
上集《FIFA 13》的球員動作表現已做得好靚，較明顯不足係射球時會有短暫時間飄移，而且射球動作變化唔多。但到《FIFA 14》，EA Sports差不多重新做過晒遊戲嘅動作及物理系統，令每個反應都更似真人。最值得講係引入Pure Shot系統，模擬出射球時的微妙動作變化，如第一時間撞射、頂波時轉向都睇落更合理，更能因應位置而做出側身凌空抽射動作，以及被對手緊逼時失去平衡下射門，新動作多達幾百款，小記試玩時就試過突入禁區第一時間撞射入網。
物理系統亦有唔少改動，如高速轉彎時所跑出嘅弧形線道會較大，急速轉向亦需要更多空間煞停，而且球賽速度會較上集快。此外，每個球員都加入職業本能（Pro Instincts），可模擬出真人的反應、預測及直覺，可預早判斷對手剷球而作出迴避，或者用手臂格開對方爭位，到臨完場仍落後時更會全力搏殺。值得一提，今集爭身位嘅重要性非常高，被對方埋身一拍好易失波，所以要盡量避免畀人埋身，或出少少術用手格開對方。
之前流傳《FIFA 14》會加入港甲球隊，好多機迷信以為真，不過遊戲正式版當然冇啦，但可證實新作加強咗南美球會陣容，如巴西甲組聯賽、阿根廷甲組聯賽同墨西哥甲組聯賽都有晒實名球會，如想玩吓剛剛修理完哨牙嘅「細哨」朗拿甸奴，大可選擇操控巴甲明尼路。小記好Buy上集引入嘅Ultimate Team儲卡組隊玩法，今集其內容進一步強化，既由上集的5個級別增至10個級別，提升挑戰性外，Xbox 360版仲會加入「Legends」名宿卡牌，有伯金、馬圖斯、雲巴士頓及古列治等30多位名宿，睇嚟小記又要努力儲卡了！
類型：運動
開發：EA Sports
平台：Xbox 360、PS3
售價：$449
查詢電話：2359 7998
撰文：布偉倫