戲Fun兇猛 智勇大激鬥
Halloween的嚇人傳統，令每年10月都變了恐怖片的黃金檔期，乜鬼都爭住亮相，但其實鬼片要得人驚，最緊要令人入到戲。最近就有兩條「院線」開畫，專為「嚇」人而設，一條挑戰膽量，一條考你智慧，重點是每位觀眾都可以真正入戲，甚至成為戲中主角，問你怕未？
殭屍、貞子 免費送嚇
講到鬼片，經典角色真係數之不盡，諸如長髮貞子、吸血殭屍、死人蠟像，無不令人毛骨悚然，但隔住銀幕接觸，驚極有個譜，不如試試跟這些妖精鬼怪做場對手戲吧！
佔地近4,000呎的「樂富廣場嘩鬼影城」剛於周五揭幕，全院鬼聲鬼戲，中西「猛」片同期放映，仲要係免費，驚死大家唔敢入場。值得一提，放映室有人數限制，4至8人不等，而片長約8分鐘，觀眾需要先打手印，再由「鬼」才導演安排欣賞哪一齣猛片，記得練大膽量，因為隨時要同朋友分開睇戲，獨自跟貞子、殭屍共處一室。若想一次過睇晒所有猛片，記得重新排隊，多謝合作……
樂富廣場嘩鬼影城
映期：即日至10月31日（逢星期五至日、公眾假期及指定日子）
地點：樂富廣場A區美食坊
門票：免費入場（凡於指定商場消費滿$200，憑兩張同一商場之即日機印發票，即可換領「鬼咁快套票」，率先以「特快優先通道」進入嘩鬼影城，套票包括特快門票2張、嘩鬼嘉年華遊戲券
2張、鬼馬螢光手帶1條。）
查詢電話：3168 0080
喪屍、巫師 等你挑機
新一代觀眾的要求愈來愈高，若認為純感官刺激有欠深度，一於走入電影世界，跟喪屍、巫婆鬥智鬥力吧！
剛於新蒲崗開業的「Mission Routes『謎路』」，以富任務性的主題故事作主導，入場人士要先觀看短片「入戲」，然後在疑幻似真的場景中化身電影角色，根據影像、聲音、物件、場地布置等線索闖過4關，限時45分鐘完成，期間必須絞盡腦汁，又要配合五感體驗，才能完成使命！由於遊戲最多只能畀3位人士同時參與，很多情況只能靠自己，十分刺激。
至於遊戲涉及的「戲」，各有不同主題，任務要求也不盡相同，想要驚嚇一點，非《屍家重地》莫屬，享受森林冒險，必選《森夜行》，不日上演的《地球末日》則走災難+科幻路線。
《屍家重地》
2066年，一種傳染性極高的病毒正在全城蔓延，一旦受到感染，患者會變成喪屍。現在只有找到解藥，才能控制疫情、解除危機，你夠膽接受挑戰嗎？
《森夜行》
位於森林深處的古堡，相傳有一位充滿怨氣的巫師，專門捉走小朋友的父母，救人的唯一方法就是要把巫師消滅……
Mission Routes「謎路」
映期：不限（有意入場者必須預約）
地點：新蒲崗彩虹道222~224號 永濟工業大廈11樓A
門票：試玩價$98/人（優惠期至9月30日）
查詢電話：3521 1113
撰文：江蔚賢
攝影：盧展程、陳富權
模特兒：阿盈、Brigitte 、Crystal（Gaiety）；Matthewc